На тыдні прапанавалі Праграму дзейнасці ўрада да 2025 года

На тыдні ўрад дзяліўся сваёй стратэгіяй на 5 гадоў наперад. Мэты і задачы для кожнай галіны: імкненне да новай лічбавай эканомікі, дзе інавацыі і ў паслугах, і ў таварах, развіццё бізнесу, аздараўленне рэальнага сектара і захаванне ўсіх сацыяльных гарантый. 2 кастрычніка Раман Галоўчанка заручыўся падтрымкай у дэпутатаў. А праз два месяцы распавёў ім з трыбуны Авальнай залы як бачыць работу Саўміна на 5 гадоў.

Так, такі часавы прамежак планаваць архіскладана, тым больш сітуацыя на знешніх рынках мяняецца хутка, і гэта не толькі, скажам, цэны на нафту і калійныя ўгнаенні. Пандэмія каранавіруса, як бачым, прымусіла перагледзець планы па развіцці досыць моцных эканомік свету. А на што робім стаўку мы, спытаемся ў нашага эканамічнага аглядальніка Святланы Лук’янюк.

Беларусь як краіна з адкрытай эканомікай, вядома, адчула ўплыў закрытых меж краін-партнёраў. І ўлічваючы дзень сённяшні, урад спланаваў галоўнае на 5 гадоў. Сацыяльная стабільнасць і эканамічны рост. Вось, мабыць, аснова. Для гэтага важна - роўнасць усіх форм уласнасці, неўмяшанне ў добрасумленную канкурэнцыю і рост прыбыткаў людзей.

Асаблівая ўвага зарплатам тых, хто сёння атрымлівае ніжэй за сярэднюю па галіне. Гэта выхавальнікі дзіцячых садоў, працаўнікі музеяў. Сярод іншых сацыяльных абавязацельстваў - памер сярэдняй пенсіі па ўзросце плануем захоўваць на ўзроўні 40 % ад сярэдняй зарплаты.

Заўсёды важна, вядома, і сваё жыллё. Урад абяцае будаваць не меней за 4 мільёны квадратных метраў за год, пры гэтым мільён сто з дзяржпадтрымкай. Асаблівая ўвага вялікім сем'ям. Але дэпутаты актыўна выступаюць сёння і за маладых.

Наогул, забяспечанасць жыллём у 2025 годзе, заяўляе Саўмін, не меней за 28,5 кв. метра на чалавека. З наступнага года запрацуе сістэма будзберажэнняў, а за пяцігодку чакаем і іпатэку ў дзеянні.

Анансаваў прэм'ер і фарміраванне новай эканомікі. Разумныя гарады, зялёныя тэхналогіі, электракары, дакладнае земляробства і нанамедыцына - гэта праекты будучыні. І іх гатовы патрымаць фінансава.

Пры гэтым, запэўнівае кіраўнік урада, доступ да рэсурсаў будзе роўны і ў дзяржкампаній, і ў прыватных. А доля інвестыцый у асноўны капітал да ВУП праз пяць гадоў - не меней за 22-23 %. Усё гэта для навукаёмістых і высокатэхналагічных паслуг і вытворчасцяў.

Сфера, за кошт якой плануецца расці, - гэта ІКТ. Яна і зараз, у пандэмійны год, нароўні з будаўніцтвам, сельскай гаспадаркай і рознічным тавараабаротам большае.

А праз пяць гадоў яе доля ў валавым унутраным прадукце Беларусі - не меней за 7,5 %. Лічбавізацыя эканомікі, бізнес-працэсаў, ды і дакументаабароту, - усё гэта павінна павысіць якасць нашага жыцця.

Але каб рухацца наперад трэба за пяць гадоў вырашыць і праблемы яшчэ сённяшнія. Ва ўрада ёсць план аздараўлення прадпрыемстваў, якім пакуль складана разлічыцца са стратамі. Але тут важны індывідуальны падыход.

Бізнесу - зялёнае святло. Ліцэнзію, абяцаюць, атрымаць будзе прасцей, адміністрацыйных працэдур стане менш, і ўмешвацца ў працу суб'ектаў кантралёры будуць радзей.

У другую хвалю бізнес абяцаюць падтрымаць. У першую гэта каштавала дзяржаве 2 мільярды рублёў. Колькі зараз пацягне, пакуль невядома, але дзеянне 143-га ўказа жадаюць падоўжыць. Ад бізнесу ўклад у экспартны кошык. Праз пяць гадоў Беларусь плануе прадаваць тавараў і паслуг не менш чым на 50 мільярдаў долараў.

Абмеркаванне ў Авальнай зале атрымалася жывым, прэм'ера доўга не адпускалі з трыбуны, больш за дзве гадзіны. І гэта нядзіўна. Бо перад тым, як галасаваць, а дэпутаты падтрымалі дакумент, жадалася спытаць пра кожны момант. Працаваць жа пасля ўсім разам.