Егіпет зацікаўлены павялічыць парк тэхнікі МТЗ

Баставаць - значыць, страчваць грошы і рэпутацыю. І працаўнікі як ніхто гэта разумеюць, бо нішу могуць заняць канкурэнты. Егіпет зацікаўлены павялічыць парк тэхнікі Мінскага трактарнага завода. Гэта стала вядома на сустрэчы кіраўніцтва прадпрыемства са старшынёй Савета дырэктараў кампаніі ECARD у Каіры. Бакі абмеркавалі выкананне дамоўленасцяў. У верасні пачаў працаваць механізм крэдытавання фермераў праз Сельскагаспадарчы банк Егіпта, што з'яўляецца важным крокам у кірунку павелічэння колькасці беларускай тэхнікі ў гэтай краіне. Таксама егіпецкі бок пацвердзіў зацікаўленасць у пашырэнні мадэльнага раду, у тым ліку за кошт камунальнай, дарожнай і іншай спецтэхнікі, якая неабходная для будаўніцтва і навядзення чысціні ў мегаполісе. Яшчэ адной тэмай перамоў сталі перспектывы навучання егіпецкіх спецыялістаў, якія будуць працаваць з беларускай тэхнікай.