Ці гатова тэхніка да ўборачнай кампаніі - КДК Беларусі праводзіць праверкі па ўсёй краіне

Гатоўнасць тэхнікі да ўборачнай кампаніі і бяспечныя ўмовы працы. У Беларусі працягваюцца маніторынгі сельгаспрадпрыемстваў. Многія гаспадаркі ўжо пачалі жаць азімыа ячмень, першыя тысячы тон збожжа новага ўраджаю закладзены на захоўванне. Як агульнымі намаганнямі ствараецца харчовая бяспека краіны - у рэпартажы Юрыя Карняловіча.

На машынным двары сельгаспрадпрыемства "Зара і К" супрацоўнікі Камітэта дзяржкантролю ўжо другі раз за некалькі тыдняў. Маніторынг у канцы чэрвеня паказаў: зернеўборачная тэхніка стаіць на захоўванні, рамонт не праводзіцца, праблемы з запчасткамі. З адзінаццаці камбайнаў выйсці ў палі гатовы толькі сем. Пасля ўмяшання правяраючых пытанне зрушылася з мёртвага пункта.

Добрушскі раён

Дзейнічаць без прамаруджвання - задача нумар адзін. Тыя, хто з ёй не спраўляецца, на асаблівым кантролі. Яшчэ нядаўна ў гаспадарцы "Жгунскае" Добрушскага раёна працавалі тры камбайны з сямі. Запчасткі на мехдвор завезлі дзякуючы ўмяшанню КДК.

Шчучынскі раён

У саўгасе "Вялікае Мажэйкава" чакаць правяраючых не сталі. Усю тэхніку сваімі сіламі падрыхтавалі яшчэ ў пачатку лета. Механізатар Сяргей Кузняцоў усе вузлы і агрэгаты камбайна перабраў асабіста. Зараз упэўнены: машына не падвядзе.

Ураджай на палях добры. Зараз тут убіраюць азімы ячмень. Пад яго адвялі 200 гектараў, у планах - значна павялічыць плошчы. Ды і спее гэтая культура раней за астатнія зерневыя.

Праўда, пасля дажджоў вільготнасць у збожжа трохі вышэйшая за сярэднюю, прыходзіцца дасушваць. Добра, што комплексы працуюць без збояў, іх падрыхтоўка вялася паралельна з тэхнікай.

Азімы ячмень з палёў дастаўляюць на зернесушыльны комплекс. За чатыры дні намалацілі каля 400 тон збожжа, але гэта толькі пачатак уборкі. Магутнасці ўстаноўкі дазваляюць за змену перапрацаваць да 120 тон.

Ураджай на палях аграрыі вырасцілі вышэйшы за леташні. Зараз галоўная задача - сабраць без страт. Пра гэта не раз гаварыў і кіраўнік дзяржавы. Гаспадаркам павінна хапіць збожжа, каб выканаць дзяржзаказ і забяспечыць якаснымі кармамі ўласную жывёлагадоўлю. Ад гэтага напрамую будзе залежаць харчовая бяспека краіны.