На Салігорскай птушкафабрыцы пашыраюць прэміум-асартымент і разам з ім рынкі збыту

Прадпрыемствы АПК Мінскай вобласці пашыраюць асартымент прадукцыі, а разам з ім і рынкі збыту. Так, на Салігорскай птушкафабрыцы адкрылі новую лінію па вытворчасці вараных перапёлчыных яек. 80 % вэнджаных прадаюць у Расію, таксама яны даспадобы і спажыўцам з Аб'яднаных Арабскіх Эміратаў. Акрамя таго, у Салігорскім раёне ў планах рэалізаваць і праект па будаўніцтве самай вялікай у нашай краіне інавацыйнай перапялінай фермы. З падрабязнасцямі Аляксей Кандраценка.

Прэміум-сегмент птушкагадоўлі

Працу работнікаў АПК асабліва шануюць у Мінскай вобласці. Вось і помнікі хлебнаму караваю і бульбе ёсць - гэта ва Уздзенскім раёне. А ў Салігорскім ў бронзе і камені ўвекавечылі не проста прадукт, але яшчэ і сімвал жыцця - яйка.

Маленькія і ўсе як на падбор. У адным з цэхаў Салігорскай птушкафабрыкі з'явіўся пладавіты навічок. Новая лінія вырабляе 25 тысяч вараных яек перапёлкі за гадзіну. Сам працэс ад апускання ў ваду і да ўпакоўкі максімальна аўтаматызаваны.

80 % вэнджаных перапёлчыных яек птушкафабрыка прадае ў Расію. Такі прадукт даспадобы і спажыўцам у Аб'яднаных Арабскіх Эміратах. Усё больш мяняюцца гастранамічныя перавагі і ў беларусаў. Так, яйка перапёлкі паступова ўваходзіць у рацыён школьнікаў.

Сёння прадукцыя прапанавана са сваім каларытам: яйкі лайт, фермерскія, а таксама халяль. А яшчэ і само мяса перапёлкі. У найбліжэйшыя гады птушкафабрыка зможа павялічыць аб'ёмы вытворчасці і асартымент прадукцыі. Усё дзякуючы праекту па будаўніцтве самай вялікай у нашай краіне інавацыйнай перапялінай фермы.

Вялікі крок на шляху развіцця сферы птушкагадоўлі сёлета зробіць і агракамбінат "Дзяржынскі". У Капыльскім раёне пабудуюць самы вялікі ў Беларусі комплекс па вытворчасці мяса індычкі, дзе толькі на старце будуць выпускаць 6 тысяч тон прадукцыі за год.