На пасяджэнні экспертна-кансультатыўнага савета пры прэзідыуме Савета Рэспублікі 5 чэрвеня абмяркуюць прымяненне заканадаўства ў галіне меліярацыі і эфектыўнае выкарыстанне такіх земляў

Так, у Беларусі сёлета плануюць увесці ў абарот 110 тыс. га меліяраваных земляў. Тое, што неабходна навесці парадак на зямлі, і кожны яе кавалачак павінен выкарыстоўвацца на карысць краіны, - патрабаванне Прэзідэнта Беларусі Аляксандра Лукашэнкі.

Сёння амаль 40 % усіх сельгасугоддзяў у Беларусі - меліяраваныя землі. А гэта 2 млн 810 тыс. га - лічбы больш чым вялікія. У Брэсцкай, Гомельскай і Мінскай абласцях засяроджана асноўная частка такіх земляў. На іх вырабляюць траціну раслінаводчай прадукцыі, у тым ліку звыш паловы зялёных кармоў, неабходных для жывёлагадоўлі.

І задача сёння - не толькі забяспечыць належны догляд за гэтымі тэрыторыямі, але і паступова пашыраць плошчы ўрадлівых земляў. Для гэтага ў галіны пастаянна ўкараняюцца новыя тэхналогіі. У тым ліку працягваецца рэканструкцыя меліярацыйных сістэм і закуп новай тэхнікі. Толькі за 2 апошнія гады было набыта больш за 1 тыс. адзінак айчыннай тэхнікі.

Аб практыцы прымянення заканадаўства ў галіне меліярацыі і эфектыўнага выкарыстання такіх земляў будуць гаварыць 5 чэрвеня ў Любані - там пройдзе пасяджэнне экспертна-кансультатыўнага савета пры Прэзідыуме Савета Рэспублікі. Удзельнікі не толькі разгледзяць становішча спраў у раёне, але і абмяркуюць перспектывы ўцягвання ў гаспадарчы абарот земляў сельгаспрызначэння, а таксама правераць, як выконваюцца даручэнні кіраўніка дзяржавы па пытаннях меліярацыі земляў.