Падыходы да цэнаў пры фарміраванні агульных энергарынкаў ЕАЭС павінны быць без дыскрымінацыі

Падыходы да цэнаў пры фарміраванні агульных энергарынкаў Еўразійскага эканамічнага саюза павінны быць без дыскрымінацыі. Такая пазіцыя Беларусі, агучаная на міжурадавым савеце ЕАЭС. Пра сённяшні дзень і планы на наступны год гаварылі анлайн.

Гэта ўжо шостая сустрэча сёлета на ўзроўні прэм'ераў. Беларусь у 2020 годзе старшынствуе ў гэтай арганізацыі. "Сёлета, у год пандэміі, партнёрам удалося захаваць усе кааперацыйныя сувязі і развіваць гандаль", - адзначыў кіраўнік беларускага ўрада Раман Галоўчанка.

Сёння на перамовах асаблівая ўвага надавалася стварэнню рынку будаўнічых паслуг і стратэгіі развіцця інтэграцыі да 2025 года. Таксама адно з важных пытанняў - спіс выняццяў і абмежаванняў на рынку "пяцёркі", якія трэба зняць за два гады. Сёлета ўдалося ліквідаваць 8 бар'ераў, але пры гэтым застаўся больш за дзясятак.

Беларускі прэм'ер звярнуў увагу Еўразійскай эканамічнай камісіі на неабходнасць наладзіць больш цесную работу па лініі ЕАЭС і ініцыятывы "Адзін пояс, адзін шлях". Гэта будзе спрыяць хуткаму перамяшчэнню грузаў і пасажыраў праз мытню, што ў выніку прывядзе да зніжэння выдаткаў для бізнесу.