Сустрэча з відэаблогерамі і пластычны спектакль - чым яшчэ здзівіць XXXIII "Славянскі базар" 9 ліпеня

Найбуйнейшы форум мастацтваў у Еўропе, XXXIII Міжнародны фестываль мастацтваў "Славянскі базар" стартаваў у Віцебску. Афіцыйнага адкрыцця яшчэ не было, але фестывальнае жыццё там ужо бурліць. А геаграфія маштабнага свята толькі расце. У 2024 годзе ўдзел прымаюць прадстаўнікі 38 краін - сярод іх Мальта, Боснія і Герцагавіна, Зімбабвэ, Сербія і іншыя.

На галоўнай падзеі музычнага і танцавальнага лета працуюць звыш 20 пляцовак. У фестывальнай афішы - каля сотні мерапрыемстваў. Сольнікі дадуць Алег Газманаў, Вікторыя Алешка, Яраслаў Сумішэўскі, Любоў Успенская і Ані Лорак. 9 ліпеня ў абноўленым міжнародным прэс-цэнтры з журналістамі сустрэўся харэограф і рэжысёр Ягор Дружынін. Дарэчы, 9 ліпеня ўвечар можна ўбачыць яго пластычны спектакль "Усюды жыццё", у якім усё зразумела без слоў. Ніякіх рэплік, а толькі акцёрская ігра і пластыка. Пасля прэс-канферэнцыі атрымалася пагутарыць з заслужаным артыстам Расіі. І вось што ён думае аб дружбе народаў і адзінстве.

У канцэртнай зале "Віцебск", дзе знаходзіцца міжнародны прэс-цэнтр, на пытанні журналістаў адказвалі спявак і блогер Амірчык, які стаў папулярны ў TikTok дзякуючы акустычным каверам на папулярныя песні, і шоумен Улад Кабякоў - за яго YouТube-каналам сочаць больш за 3,5 млн падпісчыкаў. На вялікую сцэну "Славянскага базара" відэаблогеры выйдуць 10 ліпеня. А 9 ліпеня ў 18:30 яны прымуць удзел у творчым праекце пад назвай "Госці з будучыні". Таксама чакаецца дзіцячая жараб'ёўка і цырымонія ўзнагароджання пераможцаў Міжнароднага танцавальнага конкурсу.