24 і 25 красавіка ў Мінску абмяркуюць стратэгічнае развіццё Беларусі па розных кірунках

Усебеларускі народны сход пройдзе 24 і 25 красавіка. У Мінск з'едуцца больш за тысячу дэлегатаў і звыш 700 запрошаных гасцей, яны абмяркуюць стратэгічнае развіццё Беларусі па розных кірунках - ад эканомікі да бяспекі.

Усебеларускі сход у 2024 годзе атрымаў канстытуцыйны статус - гэта значыць, УНС будзе не проста "рэкамендаваць", а кантраляваць рашэнне ўсіх ключавых пытанняў у краіне. Для пачатку ў праграме - рашэнне арганізацыйных пытанняў. Выбар старшыні Усебеларускага народнага сходу, намесніка, членаў прэзідыума - усё для суладнай працы вялікага механізму.

Дэлегаты прыедуць з усёй Беларусі - гэта людзі розных прафесій, узросту, і, што немалаважна, поглядаў. Не ва ўсіх ёсць вопыт удзелу ў такіх вялікіх палітычных падзеях, але так і задумваўся сход: "без элітарнасці", каб "чуць голас кожнага".