Засцерагчы дзяцей ад небяспечных хвароб. З 2025 года ў Беларусі дадалі адразу тры новыя прышчэпкі

Эпідэміялагічная сітуацыя ў Беларусі застаецца спрыяльнай: з пачатку года колькасць хворых знізілася на 25 % у параўнанні з аналагічным перыядам мінулага года. Засцерагчы найбольш уразлівыя катэгорыі насельніцтва дапамагаюць прышчэпкі. У краіне падоўжана кампанія па вакцынацыі супраць грыпу і COVID-19.

Каб сустрэць вясну без хвароб, неабходна задумацца аб сваім здароўі загадзя, бо менавіта ў гэты перыяд арганізм слабы пасля зімы і схільны да прастуд і іншых інфекцый. Таму важна надаць асаблівую ўвагу ўмацаванню імунітэту і прафілактыцы захворванняў. Разам з ужываннем вітамінаў, збалансаваным харчаваннем, дастатковым сном і фізічнай актыўнасцю рэкамендуецца таксама зрабіць прышчэпку супраць грыпу і іншых сезонных захворванняў, асабліва калі вы ўваходзіце ў групу рызыкі.

У Беларусі, як і ў любой іншай краіне свету, вакцынацыя насельніцтва праводзіцца ў адпаведнасці з Нацыянальным календаром прафілактычных прышчэпак. Сваю дозу засцярогі ў пэўным узросце беларусы атрымліваюць бясплатна, хаця па жаданні можна атрымаць вакцыну на платнай аснове.

Асаблівая ўвага надаецца здароўю юных беларусаў. Так, каб абараніць яшчэ больш дзяцей ад небяспечных хвароб, з пачатку 2025 года ў Нацыянальны каляндар дадалі адразу тры новыя прышчэпкі.

"У яго была ўключана руцінная вакцынацыя супраць пнеўмакокавай інфекцыі для ўсіх дзяцей ва ўзросце 2, 4 і 12 месяцаў. Дапоўнена бустарная вакцынацыя супраць коклюшу ва ўзросце 6 гадоў, а таксама ўведзена прышчэпка супраць віруса папіломы чалавека, што з'яўляецца адным з асноўных метадаў прафілактыкі раку шыйкі маткі", - расказаў загадчык аддзялення імунапрафілактыкі Рэспубліканскага цэнтра гігіены, эпідэміялогіі і грамадскага здароўя Кірыл Ігнатаў.

Прэпараты супраць гэтых інфекцый паступяць ва ўстановы аховы здароўя ў найбліжэйшы час. Вакцынаваць жа плануюць у сувязі з абноўленым Нацыянальным календаром прафілактычных прышчэпак ужо вясной. Акрамя гэтага ў Беларусі таксама ёсць магчымасць прышчапіцца ад каранавіруснай інфекцыі.