"Будуар", "Мужчынскі кабінет", "Шывок за шыўком" - свет дваранства XIX і XX стагоддзяў у Лошыцкай сядзібе

Свет дваранства XIX і XX стагоддзяў у Лошыцкай сядзібе. Паўсядзённае жыццё мінулых часоў паказана ў тэматычных блоках "Будуар", "Мужчынскі кабінет", "Шывок за шыўком". Больш за паўсотню экспанатаў прывезлі з музея "Замкавы комплекс "Мір". Пра сведкаў мінулых стагоддзяў расказала Ларыса Гулякевіч.

Бювар, ларнет, карнэ дэ баль, портбукет… Што ўяўляюць сабой гэтыя прадметы? Для чаго выкарыстоўвалі пясочніцу, якая ўваходзіла ў пісьмовы набор; навошта былі патрэбныя шчыпцы, калі надзявалі пальчаткі і як шаўковы цыліндр мог ўмясціцца ў маленькі футляр?

Галіна Мяшкова - спецыяліст - навуковец беларускай моды і дызайну. Яшчэ у мінскім Доме моды працавала з вядучымі мадэльерамі савецкіх часоў. Зараз дызайн касцюма і тэкстыль выкладае студэнтам Акадэміі мастацтваў, працуе над стварэннем беларускага музея моды.

Эксклюзіўныя сведкі мінулых стагоддзяў распавядаюць пра свет баляўі тэатра, пра папулярныя настольныя гульні і традыцыі чаявання. У гэтым дапамагаюць тэкставыя дапаможнікі, якімі можна карыстацца без экскурсавода.

Балі, свецкія прыёмы, наведванне тэатра ў канцы XIX стагоддзя патрабавалі не толькі прадуманы ўбор, але і адпаведны набор аксесуараў. Мужчына, калі выходзіў ў свет, павінен быў мець шаўковы цыліндр, кій і пальчаткі. А дама, выходзячы з дома, павінна была мець тыя ж пальчаткі, веер і… бісерную сумачку.

Лошыцкая сядзіба - своеасаблівы музей эпохі мадэрн. Арыстакратычныя аксесуары мужчынскай і жаночай моды канца XIX - пачатку XX стагоддзя з калекцыі Мірскага замка стылістычна адпавядаюць архітэктурнаму напрамку.

Да таго ж у Лошыцкай сядзібе ў выхадныя праходзяць экскурсіі з танцавальнымі майстар-класамі, дзе можна навучыцца танцам эпохі мадэрн.

Выставу "Погляд у мінулае: мода, стыль і прыгажосць" можна наведаць да канца верасня. У наступным годзе мабільная экспазіцыя пераедзе ў адзін з баранавіцкіх музеяў.