Дэпутаты прынялі папраўкі ў закон аб дзяржсімвалах

Папраўкі ў закон аб дзяржсімвалах у другім чытанні прынялі дэпутаты. Колькасць падстаў для прымянення дзяржаўнага флага пашыраецца. Сюды дадаткова ўключаюцца спартыўныя спаборніцтвы, спартыўна-масавыя, культурныя і іншыя мерапрыемствы. Паводле слоў дэпутатаў, абноўлены закон будзе спрыяць росту патрыятызму і павазе да сваіх сімвалаў.

На парадку дня сённяшняга пасяджэння таксама змяненні ў заканадаўства аб рэкламе. Дэпутаты падтрымалі забарону на камерцыйную гукавую інфармацыю ў грамадскім транспарце. І яшчэ адна навацыя - па першым патрабаванні грамадзяніна рэкламадаўца абавязаны спыніць дастаўку камерцыйных лістовак у паштовую скрыню.

Сёння дэпутаты прынялі ў першым чытанні папраўкі ў законы аб медыяцыі, а таксама ратыфікавалі дамову аб таварных знаках ЕАЭС.