Для кантролю за сітуацыяй з COVID-19 у Беларусі створаць рэгіянальныя штабы

COVID-пандэмія ў свеце зноў набірае абароты. Пад другім ударам каранавіруса – галоўным чынам еўрапейскі рэгіён. Мінулы тыдзень там прынёс самыя высокія паказчыкі захворвання.

Як супрацьстаяць інфекцыі, і якія меры дапамогуць эфектыўна стрымліваць вірус, сёння абмеркавалі ў Палацы Незалежнасці. Сярод удзельнікаў - члены ўрада, кіраўнікі ўсіх рэгіёнаў, памочнікі прэзідэнта па абласцях і, вядома, медыкі. Здароўе беларусаў прэзідэнт назаве галоўным багаццем. А клопат аб жыцці людзей - прыярытэтам палітыкі. Асаблівую турботу выклікае той факт, што вірус муціруе, і змагацца з ім становіцца складаней. І гэта галоўная прычына закрыцця беларускай мяжы. Нагадаем, гэта мера дзейнічае з 1 лістапада. Уезд для іншаземцаў немагчымы як з тэрыторыі Польшчы, Літвы, Украіны, так і Расіі.

Сёння беларуская медыцына валодае ўсімі неабходнымі рэсурсамі для барацьбы з пандэміяй. Дастаткова лекаў, сродкаў індывідуальнай засцярогі. Бальніцы і ўрачы таксама ўсім забяспечаныя. Калі спатрэбіцца, сярэдняму медперсаналу будуць дапамагаць студэнты медыцынскіх ВНУ. За сваю працу яны атрымаюць грашовую ўзнагароду. Дапамогу і надалей будуць аказваць усім у поўным аб'ёме. Сістэма адладжана. Галоўнае - не дапусціць збояў. Але, вядома, самі людзі таксама павінны думаць пра сваю бяспеку: там, дзе гэта трэба, насіць маскі і захоўваць дыстанцыю.

Для кантролю за сітуацыяй з COVID-19 створаць рэгіянальныя штабы. Адказныя за іх работу і вынікі - губернатары і памочнікі прэзідэнта. Дапамогуць ім лепшыя ўрачы-інфекцыяністы, прадстаўнікі медыцынскай навукі і іншыя спецыялісты. Групу экспертаў, якія будуць кансультаваць усе рэгіёны, сфарміруе і ўзначаліць загадчык кафедры інфекцыйных хвароб медуніверсітэта Ігар Карпаў.