Старт работы ёлачных кірмашоў у Мінскай вобласці з 20 снежня - духмяны тавар на свой густ знойдзе кожны

Па галоўны сімвал Новага года - на ўзлескі! Лясгасы цэнтральнага рэгіёна рыхтуюцца да свят на ёлачных плантацыях. Тут дрэвы любых памераў і адценняў. Падабраць таксама могуць сасну альбо піхту. Дрэвы на гэтым тыдні павязуць на ёлачныя кірмашы па ўсёй Мінскай вобласці.

Для аматараў калючых раслін у кадках ужо даступны свежы асартымент у рэспубліканскім насенняводчым цэнтры.

З хвойным настроем - Ілля Цвяткоў.

Наша здымачная група прабіраецца скрозь лясны гушчар Маладзечанскага раёна. Задача - адшукаць сярод ляснога масіву плантацыю навагодніх дрэў. І праверыць, як супрацоўнікі лясных гаспадарак рыхтуюцца да надыходу галоўнага свята гэтай зімы.

Некалькі кіламетраў заснежанай лясной дарогі - і мы на месцы. Супрацоўнікі лясгаса сустракаюць прама сярод пухнатых зялёных прыгажунь і прапануюць адправіцца на ёлачную экскурсію па іглічным парку, каб выбраць самую роўную, стройную і прыбраную.

На гэтай лясной плантацыі - 6 тыс. еўрапейскіх елак узростам ад трох да пяці гадоў. Усе дрэвы - як на падбор, бо за імі рэгулярна сочаць работнікі лесу: дадаюць неабходныя ўдабрэнні ў глебу, даглядаюць за кронай, у летні перыяд ліквідуюць пустазелле.

Прыехаць і выбраць елку прама на плантацыі можна. У гэтым дапамогуць супрацоўнікі лясгаса. А вось высякаць дрэва ў лесе самастойна строга забаронена. За гэта прадугледжаны штраф.

Ужо на наступным тыдні на лакацыі елак пасярод гушчару - закіпіць праца. Хвойныя будуць нарыхтоўваць штодзень да 31 снежня. Спецтранспартам калючы ўраджай даставяць на ёлачныя кірмашы па ўсёй Мінскай вобласці. Разам з класічнымі іглічнымі - упрыгажэннем свята стануць блакітныя елкі, піхты і хвоі.

Рэалізацыя сімвалаў Новага года ўжо стартавала ў Рэспубліканскім насенняводчым цэнтры. Тут для пакупнікоў падрыхтавалі елкі ў кадках - усіх адценняў і памераў. Кожную спецыялісты вырасцілі літаральна ўручную. Насенне змясцілі ва ўрадлівы грунт, маленькія саджанцы адправіліся ў касеты для росту, а пасля дарослыя дрэвы перасадзілі ў гаршкі. Першыя госці ўжо заязджаюць па свой калючы святочны настрой.

Маленькая калючая прыгажуня праз некалькі гадоў зможа стаць сапраўдным дарослым зялёным дрэвам. Каб расліна дасягнула такіх памераў, варта выконваць шэраг правілаў і забяспечыць належныя ўмовы росту. Тады елка парадуе ўладальнікаў на свята не адзін год запар.

Галоўнае - пакінуць елку ў халаднаватым памяшканні, не заносіць у цяпло адразу. Не ставіць ля батарэй і абагравальных прыбораў і паліваць. Можна ў ваду дадаваць цукар. Але нельга забалачваць глебу, дрэву гэта таксама не падабаецца.

А яшчэ спецыялісты насенняводчага цэнтра падрыхтавалі сувенірныя хвойныя вянкі фармату хэндмэйд. Яны таксама могуць стаць упрыгажэннем любога інтэр'еру.

Масавы старт работы ёлачных кірмашоў у Мінскай вобласці - 20 снежня. Іглічныя маркеты будуць працаваць у кожным раённым цэнтры. Духмяны тавар на свой густ знойдзе кожны.