Гораду над Сожам Гомелю споўніцца 879 гадоў

Гомель рыхтуецца да свайго дня нараджэння. У гэтую суботу аднаму з найбуйнейшых гарадоў Беларусі споўніцца 879. І што характэрна, сёлета абласны цэнтр і сталіца адзначаць дзень горада адначасова. Што чакае горад над Сожам і яго гасцей? І якія падарункі гамяльчане ўжо атрымалі напярэдадні свята? Расказвае Мікалай Скінтыян.

Для Пятра Ванюка вінаградарства - штосьці большае, чым проста хобі. Кіраўнік аматарскага клуба "Вінаград Гомельшчыны" ведае ўсе тонкасці гэтай практычна ювелірнай справы. Для яго ўдзел у фестывалі вінаграду - выдатная магчымасць не толькі паказаць свой ураджай, але і пагутарыць з калегамі.

Фестываль вінаграду, выставы рамеснікаў і тэхнікі, спартыўныя спаборніцтвы - на цэлы дзень Гомель ператворыцца ў вялізную святочную пляцоўку. Адной з галоўных лакацый стане самае любімае месца жыхароў абласнога цэнтра.

Гомельская набярэжная - жамчужына горада над Сожам - пасля маштабнай рэканструкцыі змянілася да непазнавальнасці. Менавіта яна стане адной з галоўных святочных пляцовак ужо ў гэтую суботу.

Тут жыхароў і гасцей горада чакае канцэрт на галоўнай сцэне. Дарэчы, яе мантаж ужо пачаўся. Усталёўваюцца і трыбуны для гледачоў. Арганізатары абяцаюць: свабодных месцаў не будзе.

Некаторыя сюрпрызы гараджане атрымалі, не чакаючы свята. Больш за ўсё пашанцавала самым маленькім жыхарам Гомеля. 4 буйныя гульнявыя пляцоўкі дзеці ўжо паспелі ацаніць.

А гэты падарунак - у памяць аб тых, хто даў магчымасць адзначаць дзень нараджэння горада пад мірным небам. На Алеі Герояў усталявалі таблічкі з QR-кодамі. На стэлах - імёны Герояў Савецкага Саюза і поўных кавалераў ордэна Славы, лёсы якіх былі звязаныя з горадам над Сожам. Зараз любы можа адсканаваць коды і атрымаць поўную інфармацыю аб кожным з іх.

Горад практычна гатовы адзначыць свой дзень нараджэння. З нецярпеннем чакаюць свята і самі жыхары, каб правесці час з задавальненнем і карысцю.

Фінал Дня горада будзе не менш яркім і ўражлівым, чым само свята. Роўна ў 22:00 неба Гомеля асветліць маляўнічы феерверк.