Інфармацыйныя тэхналогіі і новая пляцоўка для прэзентацыі распрацовак рэзідэнтаў - Мінскі гарадскі тэхнапарк рыхтуецца да вялікай прэм'еры

Інавацыйныя тэхналогіі для розных сфер эканомікі. Мінскі гарадскі тэхнапарк рыхтуецца да вялікай прэм'еры. Гэта маштабная пляцоўка на тэрыторыі мотавелазавода (на Партызанскім праспекце), дзе размесцяцца як вытворчасці, так і офісы. А гараджане атрымаюць доступ да новых сэрвісаў.

Дарэчы, адзін з напрамкаў самога тэхнапарка - інфармацыйныя магчымасці "разумнага горада". Такія распрацоўваюць, напрыклад, для Смалявічаў і Барысава. Пра карысныя урбаністычныя ноу-хау - у рэпартажы Аляксея Кандраценкі.

Мінскі гарадскі тэхнапарк знаходзіцца ў адным з прамысловых кварталаў сталіцы. Гэты кластар заняў плошчы старога мясакамбіната і за 10 гадоў стаў прыкметным у мегаполісе аб'ектам. Сёння тут больш за 40 кампаній-рэзідэнтаў.

Інфарматызацыя сталічнага транспарту - толькі частка работы кампаніі "Сайнс Салюшнс". Прадпрыемства стварае разумныя рашэнні для многіх сфер жыцця: фінансы, пошта, страхаванне, ахова здароўя. А гэта электронныя чэргі, пастаматы, інфакіёскі для гасцініц.

Зараз, напрыклад, кампанія працуе над тэхнічным абсталяваннем паліклінікі ў Смалявічах, якую будуюць. А яшчэ яна выпускае "разумныя" прыпынкі для Барысава. Распрацоўшчык, які сам стварае як софт, так і "жалеза", ужо трэці год рэзідэнт Мінскага гарадскога тэхнапарка.

Сёння статус рэзідэнта Мінскага гарадскога тэхнапарка - гэта не толькі прэстыж, але і важкія прэферэнцыі для вядзення бізнесу. У самога ж кластара ўжо тры вытворча-дзелавыя лакацыі.

Мінскі гарадскі тэхнапарк чакае вялікая прэм'ера. На Партызанскім праспекце ўзводзяць адну з самых маштабных і зручных па інфраструктуры індустрыяльных пляцовак краіны - больш за 170 тыс. кв. м. Там размесцяцца як вытворчыя боксы і офісы, так новыя сэрвісы для гараджан.