З-за складаных умоў надвор’я ў Беларусі ДАІ арганізавала кругласутачны маніторынг

Завея і моцны вецер прагназуюцца на сёння ў Беларусі. З-за моцных снегападаў ускладняецца сітуацыя на дарогах. За мінулыя суткі адбылося больш чым 200 аварый - у асноўным абышлося без цяжкіх наступстваў.

Уначы замяло трасу М6 - Гродна - Мінск. Інтэрнэт-карыстальнікі дзеляцца відэа ў "Тэлеграме": хуткасць руху не перавышала 60 кіламетраў за гадзіну.

Па прагнозах сіноптыкаў, сёння к вечару падмарозіць, на дарогах чакаецца галалёдзіца. Сітуацыю будзе ўскладняць і шквалісты вецер. ДАІ арганізавала кругласутачны маніторынг. Экіпажы ДПС аказваюць дапамогу ўдзельнікам дарожнага руху.

Вадзіцелям рэкамендуюць адмовіцца ад любых рэзкіх рухаў і манеўраў, асабліва каля пешаходных пераходаў і на паваротах. У ведамстве заклікаюць быць акуратнымі на зімовай дарозе не толькі вадзіцеляў, але і пешаходаў.