Як будзем плаціць дарожны збор? Рашэнне трэба знайсці ўраду і парламентарыям

Як будзем плаціць дарожны збор? Гэтая тэма ў топе навін увесь апошні тыдзень. Нагадаем, рашэнне трэба знайсці ўраду і парламентарыям. Сёння пытанне абмяркоўвалі на пашыраным пасяджэнні камісій Палаты прадстаўнікоў. Дыскусія за круглым сталом атрымалася сапраўды гарачай.

Кожны абараняў свой пункт погляду. Дэпутаты і ўрад палічылі, што найбольш прымальным будзе варыянт скасаваць дзяржмыту і ўвесці замест яе плату за карыстанне дарогамі. Яна будзе спаганяцца незалежна ад тэхагляду. А плаціць можна будзе дыферэнцыравана - за месяц, некалькі месяцаў, год ці два.

Пры гэтым для фізасоб штомесячныя стаўкі хочуць знізіць на 10 % у параўнанні з дзеючымі памерамі платы. Калі плаціш за год і больш, скідка будзе 20 %. Для арганізацый паніжэнне дзеючых ставак прапаноўваюць на 20 %. Для ветэранаў Вялікай Айчыннай вайны і інвалідаў будуць ільготы. Плаціць можна будзе праз АРІП.

Нагадаем, адным з варыянтаў, што найбольш абмяркоўваюцца, было ўключэнне збору ў цану паліва. На пасяджэнні аргументы супраць прывёў Мінфін. Па-першае, гэта інфляцыйны ўплыў на эканоміку і адначасовы рост кошту бензіну (прыкладна на 10 капеек). Так мы атрымаем вялікую разбежку ў цане паліва ў Беларусі і Расіі і негатыўны ўплыў на дзейнасць нашых нафтаперапрацоўчых заводаў. Пазіцыю Мінфіна падтрымаў Белнафтахім. Пагадзіліся з гэтым і многія дэпутаты.

Адна з галоўных навацый (і тут пазіцыі ў многіх сходзяцца) - значна павялічыць штраф за нявыплату падатку. Згодна з новымі правіламі, гэта памер двухразовай гадавой стаўкі дарожнага збору. Пазіцыя ДАІ такая: спагнанне павышанай платы за неўнясенне збору не павінна трансфармавацца ў адміністрацыйную адказнасць, гэта павінен быць грамадзянска-прававы механізм. Дарэчы, усе ўдзельнікі дыскусіі пагадзіліся: вырашэнне праблемы неапраўдана зацягнулася. І трэба ставіць кропку ў спрэчках. Сёння названы магчымыя даты запуску новага механізма. Гэта 1 студзеня або 1 красавіка наступнага года.