Ліквідацыя наступстваў снежнай стыхіі

Энергетыкі, ратавальнікі і дарожныя службы працягваюць ліквідоўваць наступствы снегападу, які прынёс цыклон «Ларс». Задзейнічаны дзясяткі аварыйных брыгад.

Толькі ў цэнтральным рэгіёне без электрычнасці засталіся амаль тры сотні вёсак, зафіксаваны некалькі выпадкаў падзення дрэў на аўтамабілі. На ўзмоцнены рэжым працы перайшлі камунальныя службы сталіцы - вуліцы і двары ачышчаюць ад снегу і апрацоўваюць супрацьгагалёднай сумессю.

Пра супрацьстаянне снежнай стыхіі - Ілья Цвяткоў.

Белыя гурбы, галалёд і практычна бясконцыя ападкі. Мінск і Мінскую вобласць зноў накрыла снежная лавіна. Дарожныя службы зараз старанна змагаюцца з наступствамі цыклона "Ларс".

Да непагадзі падрыхтаваліся загадзя. Спецтэхніка ўсіх упраўленняў кампаніі "Аўтадар" яшчэ ўчора была напагатове. Ужо вечарам на вуліцы горада выехалі пагрузчыкі, самазвалы, трактары і шматфункцыянальныя комплексы па прыбіранні снегу.

Зараз на вуліцах Мінска задзейнічана 650 адзінак тэхнікі і больш за 700 прыбіральшчыкаў тэрыторый. Каб зрабіць працэс больш хуткім, дарогі апрацоўваюць адразу дзве машыны: першая чысціць снег, другая адразу пасыпае асфальт антыгалалёднай сумессю.

Акрамя дарожнага пакрыцця пацярпелі і лініі электраперадачы. З-за моцнага ветру (парывамі да 23 метраў за секунду) у многіх раёнах вобласці населеныя пункты на час пазбавіліся электраэнергіі. Аварыйныя брыгады цяпер максімальна хутка імкнуцца аднавіць электрасеткі і вярнуць у дамы святло.

Згодна з прагнозамі сіноптыкаў, такое надвор'е будзе захоўвацца сёння ўвесь дзень. А ужо заўтра ападкі пачнуць змяняць устойлівыя маразы – да мінус 5-7 градусаў.