"Магія шкла" - выстава аўтарскага роспісу па шкле ў Мінскай абласной бібліятэцы імя Пушкіна

Казачныя персанажы, паляўнічыя-рыбаловы і цэлае шахматнае каралеўства. Больш за 50 работ у тэхніцы "роспіс па шкле" - на выставе ў Мінскай абласной бібліятэцы імя Пушкіна. У міні-скульптурах Таццяны Абросімавай каларыстыка ўсходняга арнаменту, тэмы вады, жывёл, краявіды розных краін і любімага Мінска.

Сакрэтамі "магіі шкла" з дапамогай роспісу акрылавымі фарбамі аўтар выставы падзялілася з Ларысай Гулякевіч. Зімняя казка на цёмным шкле быццам ажывае пры дапамозе акрылавых глянцавых фарбаў, клею і дэкаратыўных упрыгажэнняў.

Вось такім чынам на шкляным палатне нараджаецца карціна ці шматфункцыянальны сувенір. Бутэлька можа застацца бутэлькай, вазай ці лямпай.

Для экспазіцыі шкляной калекцыі (50 твораў) Таццяна выбрала не выставачную галерэю, а Пушкінскую бібліятэку. Лічыць, што яе вобразныя падарожжы ды гісторыі могуць натхніць пісьменнікаў і студэнтаў.

Тэмы карцін на шкле і вобразы сваіх герояў Таццяна Абросімава прыдумвае ў адпаведнасці са шкляной асновай. Формы бутэлек, кубкаў і скрынь самі падказваюць ёй тэматыку і стыль будучага твора. Тэхніка дэкупаж у сумяшчэнні з каляровым роспісам уручную дадае рамантычнасць і своеасаблівасць. Цэлая серыя работ прысвечана сімвалу года - Тыгру.

Нестандартныя экзэмпляры з'яўляюцца своеасаблівымі манекенамі для аўтарскіх убораў. Каб правільна апрануць сваіх герояў, напрыклад у ваенную форму мінулых эпох, прыходзілася звяртацца да гістарычных крыніц. Пагоны, аксельбанты, колер гарнітура.

Сярод герояў Таццяны Абросімавайусе пары шчаслівыя. Дама ў капелюшы быццам з пазамінулага стагоддзя мае кавалера - грэнадзёра царскай арміі.

Сама Таццяна родам з сонечнага Ташкента. Пасля заканчэння Барнаульскага інстытута культуры выкладала ў Алтайскім каледжы і ў Акадэміі культуры. 20 гадоў узначальвала маладзёжную бібліятэку Барнаула. У Мінску жыве толькі 5 гадоў. Сярод творчых захапленняў такія віды прыкладнога мастацтва, як жывапіс, роспіс па шкле, японская тэхніка выпальвання па тканіне і лепка з гліны. Сама праектуе модныя галаўныя ўборы.

Сучасныя бібліятэчныя ўстановы сёння перарастаюць у культурныя цэнтры з інтэлектуальнай праграмай. А персанальныя выставы прапануюць наведвальнікам новыя знаёмствы з мастакамі.