Міласэрнасць, як і вера, не мае межаў і падзелаў на канфесіі

Ужо праз некалькі дзён прадстаўнікі адной з найбуйнейшых хрысціянскіх канфесій адзначаць Нараджэнне Хрыстовае. Гэта адно з галоўных святаў амаль для паўтара мільёна беларусаў. Менавіта столькі жыхароў нашай краіны адносяць сябе да каталікоў. Так ужо склалася стагоддзямі, што 25 снежня лічаць сваёй урачыстасцю і беларусы іншых веравызнанняў. Часта ў адной сям'і мірна ўжываюцца людзі розных нацыянальнасцяў і рэлігій. Бо Беларусь у гэтым плане заўсёды вызначалася зычлівасцю і талерантнасцю.

Рымска-каталіцкая царква шматлікае робіць для ўмацавання ў грамадстве традыцыйных хрысціянскіх каштоўнасцяў - сям'і і маральнасці. Яркі прыклад таму - дзейнасць рэлігійнай місіі "Дабрачыннае каталіцкае грамадства Карытас" Канферэнцыі каталіцкіх епіскапаў у Беларусі. Яна дапамагае тым, хто жыве ў нястачы - ад дзяцей-сірот да тых, хто апынуўся ў складанай жыццёвай сітуацыі. Значнасць працы місіі была адзначаная і на вышэйшым узроўні. У 2013 годзе "Карытас" Віцебскай епархіі стала лаўрэатам прэміі "За духоўнае адраджэнне". Бо міжканфесійны свет і нацыянальная згода заўсёды шанаваліся як гаранты стабільнасці беларускага грамадства.

І такіх прыкладаў з боку каталіцкай суполкі сапраўды шмат. Так сацыяльна значную дзейнасць вядуць і манахі-капуцыны. Іх манастыр неўзабаве з'явіцца пад Мінскам - у вёсцы Копішчы. І хоць рэлігійны комплекс яшчэ не завершаны, браты ўжо праводзяць службы ў храме, які рыхтуецца да адкрыцця. Таксама рэалізуюць мноства праектаў, накіраваных на дапамогу людзям незалежна ад іх рэлігійных перакананняў і поглядаў. Аб міласэрнасці для кожнага чалавека рэпартаж Іны Пілевіч.