На міжнародным навуковым турніры па хіміі ў Беларусі ўзнагароды вышэйшай пробы - золата і дзве бронзы

Беларусь ззяе на міжнародным навуковым турніры па хіміі. Узнагароды вышэйшай пробы - золата і дзве бронзы - папоўнілі алімпіядную скарбонку нашай краіны. Сёлета спаборніцтвы прымала Саудаўская Аравія. Бездакорнасць ведаў дэманстравала і наша каманда. Сярод пераможцаў і выпускнік 10-й гімназіі Маладзечна Павел Батура.

Пра цягу да навукі расказала Аляксандра Гойтан.

Ад першай лінейкі да выпускнога вальса… Рака жыцця працягласцю 11 гадоў для Паўла Батуры бярэ пачатак з берагоў 10-й гімназіі Маладзечна. Яшчэ да ўводзін у хімію з’явілася іншая хімія - танца. Узорны калектыў "Грацыя" адкрыў Паўла як артыста-бальніка.

Кабінет з колбамі і прабіркамі, хімічнымі рэактывамі і табліцай-пасланнем Дзмітрыя Мендзялеева… З сёмага класа хімічная лабараторыя стала для Паўла Батуры месцам адкрыццяў і прагі да навукі.

Да 9-га класа Павел інтэнсіўна асвойваў не толькі агульнаадукацыйную праграму. Заданні з алімпіяд мінулых гадоў і міжнародных турніраў, а таксама сістэма работы з таленавітымі школьнікамі ў гімназіі праклалі шлях да першых перамог.

Да першых алімпіяд Паўла рыхтавала настаўніца хіміі Аксана Каляда. Яна стварыла асяроддзе для плённай работы вучняў - з пераемнасцю пакаленняў, калі ў хімічным кам’юніці роўны навучае роўнага.

Пасля перамогі на раённай, абласной і рэспубліканскай алімпіядах па хіміі ў 9-м класе Павел Батура выйшаў на міжнародны ўзровень.

Сёлета зборная Беларусі папоўніла скарбонку ўзнагарод адразу трыма медалямі - залатым і двума бронзавымі. Міжнародная хімічная алімпіяда - вяршыня для школьнікаў з усяго свету, якія захапляюцца навукай. Хімічны турнір і ўдзельнікаў з 90 краін прымала Саудаўская Аравія. 5 гадзін на тэорыю і столькі ж - на практыку.

На падмурку фундаментальнага прадмета Павел Батура пачне будаваць прафесійную кар’еру. Юнак залічаны на першы курс хімічнага факультэта БДУ, дзе пачне вывучаць хімію лекавых злучэнняў.