Незвычайныя віншаванні сёння прымалі маленькія пацыенты Гомельскай абласной дзіцячай бальніцы

На лячэнні там знаходзяцца 416 дзяцей, разам з імі 152 мамы. Пры гэтым наведванне шматлікіх аддзяленняў зараз забаронена. Навагоднюю ноч сотні дзяцей правядуць у бальніцы, таму грамадскія арганізацыі рэгіёна і горада разам з валанцёрамі ініцыявалі віншавальную акцыю. Імправізаванай сцэнай для Дзеда Мароза і ўдзельнікаў стала вулічная тэрыторыя бальнічнага комплексу. Дзеці ж занялі "месцы для гледачоў" ля вокнаў. А самым яркім момантам віншавання стаў запуск у неба паветраных шароў.

Таксама валанцёры і ініцыятары акцыі перадалі дзецям салодкія падарункі.