Чарговая старонка з гісторыі вызвалення Беларусі - на плошчы Перамогі перагарнулі сімвалічны каляндар на 25 чэрвеня 1944-га

Летапіс гераічнага подзвігу і пашана нашчадкаў. Сёння на сімвалічным календары памяці, устаноўленым на плошчы Перамогі, удзельнікі патрыятычнага праекта адкрылі чарговую старонку, якая набліжае нас да сакральнай падзеі - Дня вызвалення Мінска ад нямецка-фашысцкіх захопнікаў.

На палатне знакавая дата - 25 чэрвеня 1944-га. Менавіта ў гэты дзень нашы войскі фарсіравалі Заходнюю Дзвіну і занялі больш за 150 населеных пунктаў. Ушанаваць памяць тых, хто аддаў сваё жыццё дзеля міру на зямлі, ля Вечнага агню сабраліся прадстаўнікі Міністэрства адукацыі, грамадскіх арганізацый і актыўная моладзь. Удзельнікі мітынгу ўсклалі кветкі да манумента і хвілінай маўчання ўшанавалі памяць вызваліцеляў.

На плошчы Перамогі ўстаноўлена адмысловая кніга пашаны. На яе старонках імёны герояў Вялікай Айчыннай і лёсавызначальныя падзеі з ваеннай хронікі. Праект "Каляндар памяці" штогод праходзіць напярэдадні 3 Ліпеня.