Небяспека тонкага лёду - Асвод сочыць за рызыкоўнымі вылазкамі рыбакоў

24/7 - менавіта такі рэжым працы ў супрацоўнікаў Асвод апошнімі днямі. Мера гэтая вымушаная. З усталяваннем дзённай адлігай пачасціліся выпадкі надзвычайных здарэнняў на вадзе. Толькі за гэты год у цэнтральным рэгіёне ахвярамі сталі дзесяць чалавек.

Каб дапамога падаспела своечасова, на выратавальных станцыях дзяжураць вадалазы і медработнікі. Асвод і МНС нагадваюць нумары выратавання - 101 і 112.

У дэталях працы ратавальнікаў разбіраўся Ілья Цвяткоў. Рака Бярэзіна, што ў Барысаўскім раёне. Лёгкі мароз і яркае сонца, няма ветру - здаецца, ідэальная пара для рыбнага промыслу. Аднак супрацоўнікі Асвод нагадваюць: кантраст тэмператур уносіць карэктывы ў трываласць пакрыцця. Выхад на лёд зараз вельмі небяспечны.

Пільны позірк у бінокль - ратавальнік сочыць за акваторыяй. Кожны квадратны метр, які трапляе ў поле зроку, пад кантролем. Супрацоўнікі Асвода добра ведаюць, што прагулкі па рацэ падчас адлігі могуць стаць бядой.

Хуткасць рэакцыі на надзвычайныя здарэнні на тонкім лёдзе ратавальнікі адпрацоўваюць штодня. Важна максімальна паскорыць працэс разгортвання ў рэальных умовах. Трэніроўка - імітацыя вызвалення з лядовай пасткі ўмоўнага пацярпелага. На беразе яго перадаюць медыкам, якія аказваюць першую дапамогу.

Чалавек без спецыяльнай экіпіроўкі можа пратрымацца ў ледзяной вадзе не больш за 10 хвілін. Потым адзенне намокне і будзе цягнуць уніз - на дно. Таму калі самастойна выбрацца з палонкі не ўдаецца, лепш гучна крычаць, каб супрацоўнікі найбліжэйшай станцыі своечасова прыйшлі на дапамогу.

Асвод сумесна з супрацоўнікамі падраздзяленняў МНС уздоўж берагавой лініі праводзіць рэйды. Аматарам рыбнай лоўлі нагадваюць правілы: просяць апрануць выратавальную камізэльку, правяраюць наяўнасць вяроўкі і зачэпаў, якія дапамогуць у экстранным выпадку выбрацца з вады.

Зімовыя ўрокі бяспекі для дзяцей таксама вельмі актуальныя. Правілы паводзін ля вады найперш павінны нагадваць бацькі, а яшчэ не пакідаць дзяцей без нагляду побач з вадаёмамі. Напярэдадні дадатковых школьных канікул бяспечным паводзінам школьнікаў асаблівая ўвага.

Толькі за гэты год ахвярамі вады ў Мінскай вобласці сталі 10 чалавек. Ратавальнікі нагадваюць: лепш не рызыкаваць сваім жыццём - выходзіць на лёд толькі падчас стабільна марознага надвор'я і ў бяспечных месцах, дзе дазволены спуск на ваду.