"Полымя міру" ўзнімецца на самую высокую гару Еўропы - Манблан

Падарожнічае па Еўропе і агонь II Еўрапейскіх гульняў. Напярэдадні ў Рыме (за 50 дзён да старту II Еўрапейскіх гульняў) было запалена полымя мультыспартыўнага форуму. Кіраўнік Еўрапейскіх алімпійскіх камітэтаў Янез Качыянчыч факел перадаў Міністру спорту і турызму Беларусі Сяргею Кавальчуку. А далей нашы алімпійскія чэмпіёны розных гадоў Юлія Несцярэнка, Уладзіслаў Ганчароў і Алена Бялова "Полымя міру" ўручылі калоне байкераў, якія, зрабіўшы складаны начны пераезд, даставілі сімвал будучага мультыспартыўнага форуму ў гарадок Курмаер. Зараз агонь альпіністы ўзнясуць на вяршыню Манблан.

За ходам эстафеты сочыць наша здымачная група. З Італіі рэпартаж Станіслава Ліпскага. Папярэднічалі галоўнай спартыўнай падзеі пятніцы - запальванню агню II Еўрапейскіх - вялікая прэс-канферэнцыя, выступленне кіраўнікоў ЕАК і беларускай дэлегацыі, а таксама вось такое маляўнічае дзейства. Італьянскі хор у музейным комплексе Ara Pacis нікога не пакінуў абыякавым.

Адразу пасля кіраўнік ЕАК прэзентаваў беларускай дэлегацыі залатое аліўкавае дрэва як сімвал сяброўства і міру. А затым быў запалены першы факел II Еўрапейскіх гульняў.

Першым факеланосцам стала Юлія Несцярэнка - "белая маланка" ледзь стрымлівала эмоцыі адразу пасля такой атмасфернай цырымоніі. Уладзіслаў Ганчароў свой этап эстафеты перадаў Алене Бяловай - менавіта чатырохразовая алімпійская чэмпіёнка сімвал будучых Гульняў і лампаду перадала байкерам. У гэтых хлопцаў самы складаны этап: сваім картэжам яны даставяць агонь у Беларусь. Але пра гэта мы раскажам пазней. Пакуль жа каманда на чале з Яўгенам Бейзаком, зрабіўшы начны пераезд, даставіла агонь у гарадок Курмаер.

Тут беларускую дэлегацыю сустрэў мэр горада Стэфана Мізерочы. Афіцыйны прыём атрымаўся вельмі душэўным. Зразумела, гарадок выбраны нездарма, бо ён знаходзіцца ля падножжа гары Манблан, і менавіта ў мясцовым муніцыпалітэце наступны этап эстафеты "Полымя міру" і адбыўся: байкеры на некалькі дзён развіталіся з агнём, уручыўшы яго альпіністам, яны ўзнімуць факел на вяршыню знакамітай гары.

Адразу пасля фота на памяць і словы Стэфана Мізерочы для нашага тэлеканала. Ужо сёння альпіністы адправіліся на Манблан. Зразумела, узняты на вяршыню будзе і флаг Белтэлерадыёкампаніі. Пад’ём і спуск агню на вяршыню гары Манблан зойме каля двух сутак у залежнасці ад умоў надвор’я. Да старту ж II Еўрапейскіх гульняў застаецца 48 дзён.