Гарадскія ёлкі аздабляюць святлодыёднымі гірляндамі

Амаль 3 км гірлянд аздобяць ёлкі навагодняга Мінска! Святлодыёдныя вобразы прадугледжаны індывідуальна для кожнай іглічнай прыгажуні. Так, ля Нацыянальнай бібліятэкі загадзя ўсталявалі каркас самой ёлкі, а сёння дапоўнілі зоркай-макушкай і светлавым дэкорам. Васямнаццаціметровае дрэва ахуталі 112гірлянд, якія будуць іскрыцца бялюткімі агеньчыкамі. Хутка пасля такога дыёднага апгрэйда на зялёных лапках іглічнай з’явяцца і цацкі, якія адпавядаюць стылю. Тут будуць гіганцкія ледзяшы ручной працы.

Сёлета сталіцу ўпрыгожаць 27 навагодніх дрэў. Заўтра пачнуць усталёўваць каркас галоўнай гарадской ёлкі на Кастрычніцкай плошчы, а таксама ўпрыгожваць гірляндамі хвоі ля "Мінск-Арэны". Дарэчы, светлавыя акцэнты дапоўняць урачысты ўбор не толькі на дрэвах. У снежні ля Палаца спорту пачнецца мантаж трох вертыкальных канструкцый. Аркі і кампазіцыі будуць зіхацець ва ўнісон у кожным раёне Мінска.