Пагранічнікі ўсклалі кветкі да манумента Перамогі ў Мінску

Беларускія пагранічнікі сёння адзначаюць сваё прафесійнае свята. Мерапрыемствы праходзяць па ўсёй краіне. Прэзідэнт Аляксандр Лукашэнка павіншаваў камандаванне, асабісты састаў і ветэранаў.

"Пагранічная служба - доля моцных і мужных людзей, адданых сваёй справе, якія валодаюць асаблівымі ведамі, вытрымкай і праніклівасцю. Сваімі штодзённымі справамі вы даказваеце вернасць прысязе і народу Беларусі. Не раз, праявіўшы свае высокія прафесійныя і маральныя якасці, беларускія пагранічнікі заслужылі павагу нашых грамадзян і прызнанне замежных калегаў. Перакананы, што і надалей вы будзеце шчыра служыць Айчыне, умацоўваючы яе бяспеку", - гаворыцца ў віншаванні.

Па традыцыі ў Мінску пагранічнікі ўсклалі кветкі да манумента Перамогі. Калегі ўспамінаюць сваіх загінуўшых таварышаў і аддаюць даніну памяці воінам. Сюды прыйшлі кіраўнікі ведамства, дзеючыя супрацоўнікі і ветэраны. Сёлета пагранвойскі адзначаюць 101-ю гадавіну. Працягласць беларускай мяжы - звыш трох з паловай тысяч кіламетраў. Кантраляваць вялікую тэрыторыю дазваляе сучаснае абсталяванне. Аднак, як адзначыў старшыня ведамства Анатоль Лапо, першым чынам, бяспека на мяжы - заслуга чалавека.

Сёння беларуская мяжа пад надзейнай абаронай. Сістэматычна ведамства мадэрнізуе пагранзаставы і нарошчвае патэнцыял інжынернага абсталявання. Пасля ўрачыстага ўскладання на плошчы Перамогі ўдзельнікі цырымоніі адправіліся на Востраў мужнасці і смутку, каб ушанаваць памяць воінаў-інтэрнацыяналістаў.