Профільны клас "Юны пракурор" адкрыўся ў мінскай гімназіі № 38

Профільны клас "Юны пракурор" адкрыўся ў Мінску. Сталічная гімназія № 38 рэалізавала праект, створаны пры падтрымцы Генеральнай пракуратуры Беларусі.

25 вучняў установы будуць спасцігаць усе тонкасці юрыдычнай сферы, бліжэй пазнаёмяцца з гісторыяй стварэння органаў пракуратуры і асноўнымі кірункамі дзейнасці.

Новы прававы клас - першы ў Мінску, а ў Беларусі - пяты. У найбліжэйшы час ініцыятыву падхопяць школы і гімназіі ўсіх рэгіёнаў краіны. Падрабязнасці ў Наталлі Бардзілоўскай.

"Юныя пракуроры" - цяпер і ў сталічнай гімназіі № 38 імя Мікалая Шугаева. У новым профільным класе 25 юнакоў і дзяўчат. Акрамя асноўнай школьнай праграмы яны будуць асвойваць асновы права і вывучаць Канстытуцыю нашай краіны. Гэты "Пракурорскі клас" пяты ў Беларусі. Праект з вялікімі планамі.

Мэта стварэння пракурорскіх класаў - гэта прававое асветніцтва моладзі, таксама прафарыентаванне. На пачатку новага навучальнага года многія дзеці выказалі свае жаданні, мары, памкненні ў будучыні зрабіць уласны жыццёвы выбар у бок прафесій, звязаных з юрыспрудэнцыяй. І таксама для пракуратуры Беларусі гэта - фарміраванне патэнцыяльнага кадравага рэзерву, а таксама выхаванне юнай змены.

Новы профільны клас сёння адкрыў асабіста генеральны пракурор Беларусі Андрэй Швед. Такія ініцыятывы падхопяць ва ўсіх рэгіёнах краіны. Сёння "Юныя пракуроры" навучаюцца ў Магілёве, Гомелі, Гродне, Дзяржынску, цяпер - у Мінску.

Генеральны пракурор Беларусі даў і першы ўрок для "Юных пракурораў" 38-й гімназіі. Фармат - дыялогавая пляцоўка, на якой Андрэй Швед падкрэсліў: прафесія "пракурор" складаная, акрамя ведаў патрабуе моцных маральна-валявых якасцяў. Важна, што навучэнцы ў гэты профільны клас прыйшлі асэнсавана.

"Юны пракурор" у гімназіі № 38 - першы ў сталіцы. Да яго стварэння ў гімназіі падышлі адказна: спецыяльна абсталявалі аўдыторыі, тэматычныя рэакрыацыі, у дзяцей - новая форма, якая адразу будзе вылучаць іх сярод аднагодкаў.

У 38-й сталічнай гімназіі вялікая ўвага - патрыятычнаму выхаванню. Профільныя класы - толькі частка агульнай ініцыятывы. Навучальная ўстанова ганарыцца і сваім музеем "Памяць і час".