Пропуск на парад 3 ліпеня будзе арганізаваны з 06:30 праз 160 пунктаў

У сувязі з правядзеннем урачыстасцяў і арганізацыяй масавых гулянняў праваахоўнікі Беларусі пераведзены на ўзмоцнены варыянт нясення службы. Рух у цэнтры Мінска будзе абмежаваны, а паркоўка забаронена. Улады горада просяць з разуменнем паставіцца да павышаных мер бяспекі. У месцах святкавання будуць устаноўлены кантрольна-прапускныя пункты з асабістым надглядам. Таму ўсіх ахвочых паглядзець парад сваімі вачамі просяць прыйсці загадзя.

Займаць месцы можна ўжо з 06:30. Таксама праваахоўнікі звяртаюць увагу на прадметы, якія пранасіць нельга. З сабой можна мець безалкагольную вадкасць у празрыстай тары, не больш за паўлітра. Забаронены праход на мерапрыемствы з сабакамі, веласіпедамі і самакатамі. Асобныя пункты пропуску - яны будуць аранжавага колеру - прадугледжаны для ветэранаў Вялікай Айчыннай вайны, інвалідаў, цяжарных жанчын, бацькоў з маленькімі дзецьмі. Кантрольна-прапускны рэжым будзе працаваць і на святочным кірмашы каля Палаца спорту, а таксама падчас вячэрняга канцэрта ля стэлы "Мінск - горад-герой".