Супрацоўнікі АСВОД правялі "лядовыя" вучэнні

"Лядовыя" вучэнні правялі сёння супрацоўнікі АСВОД. На беразе вадасховішча Дразды ратавальнікі 8-мі гарадскіх станцый адпрацоўвалі зладжанасць дзеянняў падчас надзвычайных сітуацый. Ім у дапамогу - новыя аэралодкі. "Піранні" чацвёртага пакалення - мабільныя і хуткія, іх перавагі можна ацаніць найперш падчас перападаў тэмператур. Супрацоўнікам АСВОД такая тэхніка вельмі неабходная падчас аказання дапамогі на лёдзе.

Падчас абходу акваторый ратавальнікі папярэджваюць рыбакоў аб выкананні мер бяспекі, бо тонкі лёд у гэтыя дні не заўсёды спыняе сталічных аматараў зімовай рыбалкі. Пры гэтым спецыялісты нагадваюць: мінімальная таўшчыня лядовага покрыва для бяспечнага перамяшчэння - 7 сантыметраў. Пры гэтым выходзіць на лёд можна толькі ў спецыяльна абсталяваных месцах у зоне бачнасці супрацоўнікаў выратавальнай станцыі.