Стратэгічныя арыенціры і лепшыя методыкі вызначылі на педагагічнай канферэнцыі ў Маладзечне

Лічаныя дні застаюцца да пачатку новага навучальнага года. Да Дня ведаў дзеці рыхтуюцца разам з бацькамі: набываюць школьную форму і заплечнікі, канцылярскія прылады. Праграму для першых урокаў складаюць і настаўнікі. Так, стратэгічныя арыенціры і лепшыя методыкі вызначылі сёння на абласной жнівеньскай педагагічнай канферэнцыі ў Маладзечне. Маладыя спецыялісты і ветэраны працы, кіраўнікі ўстаноў адукацыі - свята "Час патрыётаў: ад традыцый да сучаснасці" аб'яднала каля тысячы чалавек з усіх раёнаў. Лепшых узнагародзілі: ад Міністэрства адразу 16 нагрудных знакаў "Выдатнік адукацыі", а таксама каля 20 ганаровых грамат і падзяк ад Мінаблвыканкама. Акрамя таго, на форуме абмеркавалі перспектывы і дасягненні сферы адукацыі: сярод пытанняў, напрыклад, мультымедыйныя праекты і грамадзянска-патрыятычнае выхаванне моладзі, умовы для прафесійнага развіцця маладых педагогаў. Дарэчы, толькі сёлета ў рэгіёне іх больш за 1 100 чалавек.

Рэгіянальны педагагічны форум адбыўся на базе Палаца культуры Маладзечна. З самай раніцы там працавалі тэматычныя выставы. Школы і гімназіі, каледжы і ліцэі - установы падрыхтавалі інтэрактыўныя стэнды і прэзентавалі свае праекты. Сярод іх, напрыклад - экспазіцыі, прысвечаныя Году гістарычнай памяці; выставы тэхнічнай і мастацкай творчасці, ваенна-патрыятычныя клубы. Разгарнуліся на пляцоўцы таксама бізнес-інкубатар і "Парад прафесій".