Кветкавыя пано ўжо можна пабачыць на вуліцах Мінска

Паўтара мільёна летніх кветак высадзяць у Мінску. Новыя каларытныя кампазіцыі ўжо з'яўляюцца на сталічных вуліцах. Віёлы, напрыклад, распусціліся па праспекце Незалежнасці (каля Белдзяржцырка). Расліна ўстойлівая да тэмпературных перападаў. Толькі да 9 мая высадзяць амаль 60 тысяч гэтых кветак. Клумбы дапоўняць таксама аксаміткі, бягоніі, цынерарыі. У фларыстычны мікс трапяць і мнагалетнікі. Завяршыць усе работы па кветкавым афармленні сталіцы плануюць у чэрвені. Фарбаў гораду дададуць ампельныя расліны і вертыкальныя кампазіцыі. Азеляніцелі ўсталююць каля 8 тысяч кашпо, з'явяцца новыя формы кветнікаў.

Сярод зялёных ноу-хау афармленне развязкі па вуліцы Арлоўскай. У цёмны час камбінаваная кампазіцыя будзе падсвечана. Новыя кветнікі таксама з'явяцца да 955-годдзя Мінска. Акрамя таго, святочныя фларыстычныя пано, прысвечаныя круглым датам, будуць створаны ў раёнах-юбілярах.