У Беларусі маразы захаваюцца мінімум да 20 студзеня

Моцныя арктычныя маразы захаваюцца на ўсёй тэрыторыі краіны яшчэ мінімум 4 дні. Каб пазбегнуць надзвычайных здарэнняў, усе арганізацыі, якія маюць да гэтага дачыненне, пераведзены на ўзмоцнены варыянт работы. А валанцёрамі Чырвонага Крыжа арганізаваны стацыянарныя і мабільныя пункты абагравання, у якіх можна выпіць гарачай гарбаты. Пры неабходнасці могуць выдаць цёплую зімовую вопратку. Пункты абагравання працуюць штодня.

Таксама працуе гарачая лінія 139 для дапамогі адзінокім пажылым і інвалідам. Ім могуць дапамагчы ў дастаўцы прадуктаў, лекаў, а таксама расчысціць снег.

У такія маразы павышаецца рызыка атрымання траўм: абмаражэння і пераахаладжэння. Медыкі раяць абмежаваць час знаходжання на вуліцы.