Даведаліся, як дзейнічае клопат пра здароўе ў маленькіх вёсках і што прынясуць высокія медыцынскія тэхналогіі Барысаву

Медыцыну крокавай даступнасці развіваюць у Мінскай вобласці. Акцэнт на мабільныя і модульныя ФАПы. Добры прыклад у гэтым дэманструе Барысаўскі раён, дзе такія працуюць і ўжо добра сябе зарэкамендавалі. Працягнецца і мадэрнізацыя фельчарска-акушэрскіх пунктаў. Як дзейнічае клопат пра здароўе ў маленькіх вёсках і што прынясуць высокія медыцынскія тэхналогіі гораду Барысаву - падрабязнасці ў Аляксея Кандраценкі.

Напрыклад, будынак у вёсцы Жыцькава Барысаўскага раёна - новабудоўля, хоць яго па сутнасці не ўзводзілі, а зманціравалі на гатовым падмурку. Для мясцовых жыхароў гэта астравок, дзе вырашаюцца пытанні аховы здароўя.

Такую сельскую міні-паліклініку зрабілі на БАТЭ - Барысаўскім заводзе аўтатрактарнага электраабсталявання. Па памерах гэта як кампактная трохпакаёвая кватэра - цёплая, светлая і ўтульная.

Вось ужо больш за дзесяць гадоў у Жыцькаве працуе Аксана Ржэвуцкая - чалавек з вялікім сэрцам, чулай душой і моцным характарам. Пачынала ў Барысаўскім раддоме. Сёння ў загадчыцы ФАП праца не менш адказная. Даводзіцца аператыўна вырашаць пытанні здароўя сваіх пацыентаў, а гэта паўтысячы чалавек. ФАП абслугоўвае чатыры вёскі.

Сёння ў Барысаўскім раёне працуюць 25 фельчарска-акушэрскіх пунктаў. За апошні час іх мадэрнізавалі. Ёсць ў тым ліку і два мабільныя - медык можа прыехаць у самую аддаленую вёску. Такія аўтобусы курсіруюць па сваім графіку.

Сам жа Барысаў год за годам не проста ўдасканальвае сістэму аховы здароўя, але і задае новыя трэнды ў медыцыне. Не так даўно тут адкрыўся дзіцячы шматпрофільны корпус пры цэнтральнай раённай бальніцы. У горадзе на Бярэзіне асвоілі складаныя высокатэхналагічныя аперацыі. Узводзяць і новыя неабходныя аб'екты.

Гэты год пройдзе пад знакам вялікіх прэм'ер у структуры аховы здароўя Мінскай вобласці. Сярод іх - новы корпус абласнога радзільнага дома, лячэбны корпус у пасёлку Дружны, а таксама вялікая паліклініка ў горадзе Смалявічы.