У Белтэлерадыёкампаніі падвялі вынікі конкурсу дзіцячага малюнка "Нам мір завешчана берагчы"

У Белтэлерадыёкампаніі сёння ўзнагародзілі пераможцаў Рэспубліканскага конкурсу дзіцячага малюнка "Нам мір завешчана берагчы". Ініцыятарам яго выступіла Беларускае грамадскае аб'яднанне ветэранаў. Дзецям прапанавалі паразважаць на найважнейшыя тэмы: вайна і мір, Вялікая Перамога і памяць герояў. Да ўдзелу запрасілі тры ўзроставыя групы: 7-9, 10-12 і 13-15 гадоў. Канкурсанты падалі свае аўтарскія работы, выкананыя ў розных відах выяўленчага мастацтва - ад жывапісу да змяшанай тэхнікі. Журы ўзначаліў заслужаны дзеяч мастацтваў, мастак Мікалай Апіёк. Медыяхолдынг выступіў партнёрам конкурсу.

Конкурс прымеркаваны да 80-годдзя вызвалення Беларусі. Усяго паступіла каля 6 тыс. работ, з іх эксперты выбралі 63. Убачыць іх можна ў спецыялізаваным каталогу. Усе ўдзельнікі атрымалі каштоўныя прызы.

Пасля ўрачыстай цырымоніі ўзнагароджання ў самай маштабнай студыі Белтэлерадыёкампаніі - 600 метраў - дзеці і іх бацькі адправіліся на экскурсію па тэлецэнтры, азнаёміліся з гісторыяй айчыннага тэлебачання і зрабілі памятныя фота.