У Дзяржынскім раёне знаходзіцца больш за сотню месцаў памяці - напамін пра цану Вялікай Перамогі, з'яўляюцца і новыя

Напамін пра цану Вялікай Перамогі - у брацкіх магілах, у помніках і мемарыялах. Напярэдадні свята гэта месцы ўсенароднага пакланення і пашаны. Свае сімвалы ёсць і ў Дзяржынскім раёне. Тут больш за сотню месцаў, да якіх прыносяць кветкі, прыводзяць дзяцей і ўнукаў, каб перадаць моладзі павагу да гераічнай гісторыі свайго народа і сваёй малой радзімы.

У рэгіёне з'яўляюцца і новыя месцы памяці - Дзяржынск вядзе вялікую пошукавую працу. Наталля Бардзілоўская пра вяртанне імёнаў.

Побач з посудам і прадметамі побыту - зброя: рэшткі вінтовак, снарадаў і мін. Выставачны рад сведчыць, што нашыя дзеды і прадзеды ў 40-х былі вымушаны адкласці ў бок мірныя хатнія справы і стаць на абарону Радзімы, свайго народа, сваёй зямлі. Экспазіцыя, прысвечаная Вялікай Айчыннай, заўсёды была ў цэнтры Дзяржынскага раённага краязнаўчага музея. Да Года гістарычнай памяці яна грунтоўна дапоўнілася зборам, які расказвае пра генацыд беларускага народа падчас ваеннага ліхалецця.

У гады Вялікай Айчыннай вайны пацярпелі 29 вёсак. 5 з іх паўтарылі лёс Хатыні. Былі спаленыя ўшчэнт разам з мірнымі жыхарамі.

Новы музейны рэсурс запатрабаваны. На аснове яго дакументаў, прадметнага рада, фота праводзяць тэматычныя маладзёжныя праекты, экскурсіі для школьнікаў, дыялогі пакаленняў. Напярэдадні 77-й гадавіны з Дня Перамогі сустрэча старшакласнікаў і прадстаўнікоў мясцовай ветэранскай арганізацыі. "Мы будзем вечна помніць подзвіг землякоў" - на імпрэзе размова не проста пра вайну, а знаёмства з гераічнымі мясцовымі жыхарамі, байцамі франтоў, партызанамі і падпольшчыкамі-ўраджэнцамі Дзяржынскага края.

Імя Міхаіла Гармозы - на гранітным помніку ў цэнтры Дзяржынска. Тут жа яшчэ некалькі памятных знакаў героям Вялікай Айчыннай вайны. Усяго ў раёне 40 мемарыяльных пунктаў і 75 воінскіх пахаванняў.

Адной з самых паказальных лакацый паспяховага ваеннага пошуку з'яўляецца вёска Паланевічы. Мемарыял цяпер з некалькіх помнікаў, а пачынаўся з аднаго каменю. І сёння пахавальнае месца пашырае свае межы. У найбліжэйшых лясах працягваюць сваю працу пошукавыя батальоны, іх сумныя знаходкі (астанкі чырвонаармейцаў, якія загінулі ў 40-х) знаходзяць вечны спачын менавіта ў паланевіцкай зямлі.

Догляд за помнікамі вайны - справа мясцовых жыхароў, прадпрыемстваў і гаспадарак, навучальнай моладзі. Вось мемарыял на скрыжаванні вёскі Воўка з'явіўся дзякуючы тутэйшым энтузіястам. Некалькі гадоў таму месца пачалі рэканструяваць, капітальна ўдасканальваць. Работы за кошт раённага і рэспубліканскага суботнікаў. Зямля ў Воўцы - адна са шматпакутных.

"Ніхто не забыты. Нішто не забыта". Гэта формула жыцця сённяшніх жыхароў Дзяржынскага раёна, якія зберагаюць памяць пра вайну праз пакаленні, шануючы жывых ветэранаў і клапатліва даглядаючы помнікі нашай гераічнай гісторыі.