У Мінску ўшаноўвалі новых лаўрэатаў спецфонду Прэзідэнта па сацыяльнай падтрымцы таленавітай моладзі

Сёння ў Мінску ўшаноўвалі новых лаўрэатаў спецфонду Прэзідэнта па сацыяльнай падтрымцы таленавітай моладзі. У зале Нацыянальнага дзіцячага тэхнапарка сабралася інтэлектуальная і творчая эліта нашай краіны - больш за паўсотню адораных маладых людзей. Усе яны - вучні і студэнты мінскіх устаноў сярэдняй і вышэйшай адукацыі. Гэта пераможцы рэспубліканскіх алімпіад па вучэбных прадметах, турніраў юных матэматыкаў і фізікаў, аўтары даследчых работ па навукова-тэхнічнай творчасці, а таксама фіналісты моладзевага праекта "100 ідэй для Беларусі".

Традыцыя адзначаць дасягненні і таленты маладых людзей на самым высокім узроўні ў Беларусі з'явілася 28 гадоў таму. За гэты час лаўрэатамі і стыпендыятамі сталі тысячы таленавітых маладых людзей. Выклбючныя заслугі і перамогі ў рэспубліканскіх і міжнародных спаборніцтвах рознага профілю - партфоліа школьнікаў і студэнтаў, якія атрымалі падтрымку і ганаровы статус лаўрэата спецфонду Прэзідэнта.