Выстава "Беларусь інтэлектуальная" стартуе ў Мінску. Што падрыхтавалі для наведвальнікаў?

20 студзеня ў Мінску стартуе выстава "Беларусь інтэлектуальная". Настолькі маштабная дэманстрацыя навукова-тэхнічных распрацовак у краіне праходзіць упершыню. Яна арганізавана па даручэнні кіраўніка дзяржавы. Пакажуць каля 400 узораў па розных напрамках. Акцэнт будзе зроблены на распрацоўках моладзі. Нашы фізікі анансуюць зусім новыя тэхналогіі, напрыклад, перадачу інфармацыі ў космасе з дапамогай лазера, а яшчэ сістэму хуткага тэст-аналізу на вірусы. Што яшчэ падрыхтавалі для наведвальнікаў? Падрабязнасці ў Аліны Лапо.

Штучны інтэлект, IT- і біятэхналогіі, робататэхніка - 400 узораў інавацый на адной пляцоўцы. Практычна ўвесь патэнцыял беларускай навукі. Адна з цэнтральных экспазіцый - электратранспарт. Акадэмія навук прэзентуе два каркасныя аўто і спорткар.

Дарэчы, машыны імпартазамяшчальныя - узровень іх лакалізацыі блізкі да 90 працэнтаў. Сярод унікальных распрацовак і звышадчувальныя цеплавізарныя сістэмы. Пакажуць беларускі ізумруд вагой 50 карат, яго ўдалося вырасціць памерам з грэцкі арэх.

Больш за сто інавацыйных распрацовак у ахове здароўя

Сотня інавацыйных распрацовак у медыцынскім блоку. Сярод іх і ўнікальная прадукцыя, якую сусветная супольнасць яшчэ не бачыла.

Сёння ў краіне кожны пяты даследчык - гэта малады навуковец, якому таксама ёсць што паказаць. Як гавораць арганізатары, іх прастора на выставе сярод цэнтральных, а па маштабах дзесьці не саступае старэйшым калегам. Тэхналогіі для асваення космасу, сярод іх новы нанаспадарожнік БДУ, які запусцяць ужо сёлета. Вялікі блок і прамысловасці: тут, напрыклад, агрэгаты для павелічэння здабычы нафты. А яшчэ біяраскладальная ўпакоўка, у тым ліку аналаг тэтрапака, харчовы ЗD-прынтар і лінейка ўгнаенняў.

Інавацыі - заўсёды аснова сур'ёзных зрухаў у нашым жыцці. На выставе можна прасачыць іх поўны цыкл: ад нараджэння перадавых навуковых распрацовак да трансферу ў рэальны сектар эканомікі. Да таго ж наглядна пакажуць, як манетызаваць перспектыўную ідэю.

Арганізатары запэўніваюць: такое багацце сучасных беларускіх тэхналогій не пакіне абыякавым нікога. Выстава будзе працаваць усе выхадныя ў Нацыянальным цэнтры "БелЭкспа".