Агароджа ў Белавежскай пушчы перашкаджае натуральнай міграцыі дзікіх жывёл, але дазваляе выштурхваць мігрантаў
Бомбай запаволенага дзеяння называюць беларускія навукоўцы еўрапейскую калючку на мяжы з нашай краінай. Прымяняючы зброю супраць усяго жывога, палякі парушаюць усе міжнародныя канвенцыі. Наступствы - разбурэнні натуральнай міграцыі жывёл і падтапленні тэрыторый - могуць узнікнуць праз некалькі дзясяткаў гадоў. Папуляцыя зуброў, аднаўленнем якой наша краіна займалася дзесяцігоддзямі, зараз пад пагрозай.
Марыя Тройніч аб высокай цане за безадказнасць еўрапейскіх палітыкаў.
Агароджа ў Белавежскай пушчы перашкаджае жывёлам. Бетон, метал, калючы дрот. На фоне векавога лесу яна выглядае недарэчным іншародным збудаваннем. Нягледзячы на шматлікія пратэсты, петыцыі цэлых супольнасцяў навукоўцаў і незадаволенасць простых беларусаў і палякаў, масіўная агароджа ў Белавежскай пушчы ўзведзена.
Вялізны прыродны масіў, які стагоддзямі быў адным цэлым, палякі разрэзалі на дзве часткі. Убачыўшы здымачную групу АТН Белтэлерадыёкампаніі, па той бок пачынаецца ажыўленне: да лініі дзяржмяжы падцягваюцца вайскоўцы ў балаклавах і тэхніка. Зрэшты, польскім вартавым турбавацца няма чаго.
Пяць метраў у вышыню і з калючым дротам наверсе. Праз такую агароджу не пройдзе ні чалавек, ні звер. Польскі бок абяцаў зрабіць спецыяльныя калідоры для жывёл. Але фортка, пад якой бетонавы метровы парог, зачынена. Калідорам такі праход назваць можна толькі ўмоўна. Як ім змогуць скарыстацца зубры, казулі, рысі і іншыя жывёлы - пытанне рытарычнае.
Прымяненне не па прызначэнні знайшоў польскі бок. Паводле інфармацыі беларускага Дзяржпагранкамітэта, праз такія форткі на нашу тэрыторыю выштурхваюць бежанцаў.
Шкода агароджы ў Белавежскай пушчы
Даўжыня сцяны ў Белавежскай пушчы - 65 кіламетраў. Яна стала на шляху асноўных міграцыйных калідораў для жывёл у Еўропе. Праз такія праходы змогуць прабрацца толькі дробныя млекакормячыя і рэптыліі.
Для прыроды агароджа стала бомбай запаволенага дзеяння
Белавежская пушча - самы стары лес Еўропы. Аб'ект Сусветнай спадчыны ЮНЕСКА.
Рамсарская і Бернская канвенцыі, Кіеўскі пратакол, дырэктывы ЕС - толькі няпоўны спіс нормаў міжнароднага заканадаўства, якімі грэбавалі падчас узвядзення агароджы. Навукоўцы ўпэўнены: падзел парушыць цэласнасць масіву, які стагоддзямі жыў як адзіны арганізм. І гэта можа прывесці да сапраўдных прыродных катастроф. Спецыялісты Нацыянальнай акадэміі навук Беларусі правялі вялікае даследаванне. Для прыроды агароджа стала бомбай запаволенага дзеяння: сумныя наступствы могуць узнікнуць праз некалькі дзясяткаў гадоў, бо сцяна прайшла і па воднай мяжы. Парушэнне натуральнага гідралагічнага рэжыму можа прывесці да падтапленняў, а гэта дрэнна паўплывае на рэдкія віды птушак.
Камітэт Бернскай канвенцыі адрэагаваў на ўзвядзенне ў Белавежскай пушчы
Адной з першых рэакцый беларускіх навукоўцаў стаў зварот у сакратарыят Бернскай канвенцыі. І той запатрабаваў ад Польшчы тлумачэнняў.
28 лістапада пройдзе пасяджэнне камітэта Бернскай канвенцыі, на якім польскі ўрад абавязаны даць справаздачу аб пабудаванай агароджы.
Застаецца чакаць, як ацэняць у Страсбургу з'яўленне агароджы і нанясенне шкоды запаведнаму лесу. Зразумела адно: беларусы будуць змагацца за свой нацыянальны набытак.