Зімовая казка ў Нясвіжскім замку ў тэхніцы "ірландскія карункі"

Нясвіж у прадчуванні навагодніх свят. У праграме як традыцыйныя, любімыя ўсімі праекты, так і прэм'ерныя. Сярод іх конкурс сучаснай ёлачнай цацкі "Святло Раства"; звязаныя ў тэхніцы "ірландскія карункі" святочныя ўпрыгожанні і не толькі. Па зімовую казку ў Нясвіжскі замак адправілася Ларыса Гулякевіч.

Навагоднія ўрачыстасці ў Нясвіжскім замку гэтай зімой пачаліся... з летняй сукенкі. Дзясяткі рознакаляровых фрагментаў - лугавыя кветкі - уручную звязалі шыдэлкам адзінаццаць каруначніц з пяці краін. Ажурны букет даслалі ў Беларусь па пошце. У выніку атрымаўся чароўны ўбор пад назвай "Лета". Рукадзельніц з розных куткоў свету аб'яднала стваральнік школы аматараў ірландскіх карункаў Вольга Старасціна. Міжнародны праект атрымаў назву "Звяжам свет прыгажосцю".

Гэта ўжо другая сукенка з калекцыі "Поры года". Летась праект адкрывала "Вясна". Паступова ў карункавым гардэробе з'явяцца ўборы "Восень" і "Зіма".

А пачыналася ўсё тры гады таму з вытананчаных узорных шароў, якія ўпрыгожылі адну з навагодніх ёлак замка. Нясвіжская калекцыя ўпрыгожанняў папаўняецца.

Калекцыю навагодніх шароў, выкананых у тэхніцы "ірландскія карункі", у замку Радзівілаў дапаўняюць шкляныя падсвечнікі з вязанымі абажурамі. Сама ідэя падказвае, як можна ўпрыгожыць хатні інтэр'ер з дапамогай вязання.

Сярод карункавага царства белай залы чатырнаццаць новых ёлачных цацак, прапанаваных на міжнародны конкурс "Святло Раства". Гэта свет фантазій майстроў, якія працуюць у розных тэхніках.

Вышытыя пацеркамі, звязаныя шыдэлкам, распісаныя фарбамі - ёлачныя цацкі, што прапануюцца на сёлетні конкурс, створаны з розных матэрыялаў, але аб'яднаны тэмай Раства, казак і легенд роднага краю.

Арыгінальныя аўтарскія цацкі майстроў з розных краін і рэгіёнаў Беларусі папоўняць святочную калекцыю замка Радзівілаў. Усяго пад Новы год Нясвіжскі музей упрыгожаць больш за 20 зіхатлівых ёлак.