Ахова дзяржмяжы, работа пагранічнікаў і сітуацыя з мігрантамі - пытанні гарантавання бяспекі меж Беларусі абмеркавалі на нарадзе ў Лукашэнкі

Ахова дзяржмяжы на зямлі і ў паветры, вынікі работы пагранічнікаў летась і сітуацыя з бежанцамі. Гэты спектр пытанняў падняты сёння на нарадзе ў Прэзідэнта.

У пачатку года кіраўнік дзяржавы падпісвае рашэнне аб ахове нашых меж. Мерапрыемства хоць і традыцыйнае, але гэта падстава падрабязна абмеркаваць профільныя пытанні. Сітуацыя на дзяржаўнай мяжы застаецца прагназуемай і кантраляванай. У той жа час у мінулым годзе захоўваліся знешнія выклікі памежнай бяспекі. Яны звязаны з мілітарызацыяй памежных рэгіёнаў сумежных дзяржаў ЕС і Украіны, актывізацыяй разведвальнай дзейнасці, а таксама спробамі пранікнення ў Беларусь радыкальна настроеных асоб.

Сёння каля беларускай мяжы засяроджана групоўка ўзброеных фарміраванняў сумежных дзяржаў Еўрасаюза і Украіны агульнай колькасцю каля 23,5 тыс. чалавек. Вядзецца актыўная паветраная разведка беларускай тэрыторыі з выкарыстаннем беспілотнікаў: з пачатку ваеннай спецаперацыі зафіксаваны амаль паўтысячы такіх палётаў уздоўж дзяржаўнай мяжы. Сёлета асноўныя намаганні ў ахове мяжы будуць засяроджаны на ўкраінскім кірунку, а таксама на ўчастках, дзе магчыма ўзнікненне новых знешніх выклікаў і пагроз памежнай бяспекі. У ліку асноўных задач на гэты год - павышэнне баявой гатоўнасці органаў пагранслужбы, нарошчванне баявых магчымасцяў манеўраных груп, удасканаленне інфраструктуры дзяржмяжы, уключаючы ўзвядзенне новых меж аховы і абсталявання іх самымі сучаснымі тэхнічнымі сродкамі на найбольш небяспечных участках.