Прэзідэнт уручыў спецпрэміі

Калядныя дні ў нашай краіне багатыя на добрыя і значныя для беларусаў традыцыі. Адна з іх прэмія "За духоўнае адраджэнне". Яе лаўрэаты - людзі, якія беражліва захоўваюць і прымнажаюць самае дарагое, што ёсць у нас: культуру, традыцыі, духоўнасць і гісторыю. Сваёй працай уносяць асаблівы ўклад у справы міласэрнасці і дабрачыннасці, прасоўваюць ідэі гуманізму, услаўляюць нашу краіну на спартыўных арэнах.

Мінулы год для ўсіх выдаўся на рэдкасць няпростым. Мабыць, найцяжэй было медыкам. Іх самаадданую працу цяжка пераацаніць. Узнагароды ўдастоены калектыў Мінскай дзіцячай інфекцыйнай бальніцы. Менавіта сюды паступіў першы маленькі пацыент з каранавірусам. 2020 гэта яшчэ і год 75-годдзя Вялікай Перамогі. Трагічныя падзеі страшнай вайны не забытыя нашым народам, яны захаваныя ў месцах гістарычнай памяці. Адно з іх на месцы спаленай вёскі Ала. Боль і горыч у бетоне і камені перадалі архітэктары праекта, за што таксама ўдастоеныя ўзнагароды.

Кіраўнік дзяржавы таксама ўручыў 10 спецпрэмій дзеячам культуры і мастацтва, а таксама спецпрэмію "Беларускі спартыўны Алімп". Вельмі прыемна, што ўшаноўвалі і нашых калег. Лаўрэатам стаў загадчык аддзела спартыўных навін АТН Мікалай Стула.

Падзеі мінулага года паказалі: нам трэба берагчы тое, што створана, і без узрушэнняў рухацца наперад. Кожнаму з гэтых людзей і іх вялікім калектывам прыйдзецца зрабіць свой пасільны ўклад.