Галоўная хакейная інтрыга вырашылася! Жлобінскі "Металург" выйграў Кубак Прэзідэнта

Фінальнае супрацьстаянне жлобінскага "Металурга" і гродзенскага "Нёмана" стала сапраўднай спартыўнай драмай і аб'яднала дзясяткі тысяч балельшчыкаў з усіх куткоў краіны. Кропка была пастаўлена ў Гродне.

Гэта быў фінал мары. Дружыны падарылі аматарам беларускага хакея сапраўднае спартыўнае свята. Бескампраміснае сяміматчавае супрацьстаянне, у якім было ўсё: шмат закінутых шайбаў і выдатныя сэйвы варатароў, вострыя і імгненныя атакі. Перамагчы магла любая з дзвюх каманд. Але сёлета гэта ўдалося зрабіць менавіта "Металургу". Не проста выйграць, а абараніць тытул, што ў спорце часам больш складана. Кожны матч гэтай серыі праходзіў пры аншлагу. Часта самі хакеісты называлі балельшчыкаў сёмым гульцом на пляцоўцы. Тое, што ў фінале сустрэліся сапраўды роўныя па сіле клубы, адзначыў і кіраўнік дзяржавы. Сёння Прэзідэнт таксама сачыў за вырашальнай бітвай з трыбун гродзенскага Лядовага палаца.

Сярэбраныя медалі ў хакеістаў гродзенскага "Нёмана". Сёння можна з упэўненасцю сказаць, што гэтыя ўзнагароды з залатым адлівам. Усе мы памятаем фантастычны камбэк каманды Яўгена Летава, калі гродзенцам удалося адыграцца ў паўфінальнай серыі з "Юнацтвам" з ліку 0:3. А золата адпраўляецца ў Жлобін. Медалі чэмпіёнам краіны ўручалі гульцы каманды Прэзідэнта Беларусі. І самы ўрачысты і хвалюючы момант: кіраўнік дзяржавы ўручыў Кубак Прэзідэнта адразу двум капітанам "Металурга" - Сяргею Касціцыну і Яўгену Саламонаву.