У Мінску стартуе міжнародны турнір па мастацкай гімнастыцы на прызы алімпійскай чэмпіёнкі Марыны Лобач

Свята прыгажосці і вытанчанасці стартуе 21 кастрычніка ў мінскім Палацы мастацкай гімнастыкі. На працягу трох дзён грацыі разыграюць узнагароды міжнароднага турніру на прызы алімпійскай чэмпіёнкі Марыны Лобач.

Сёлета спаборніцтвы пройдуць у новым фармаце.Усе ўдзельніцы па выніках жараб'ёўкі былі падзелены на каманды, у кожнай з якой ёсць свая назва, напрыклад, "Валошкі", "Півоні" або "Маргарыткі". У залік кожнай з каманд пойдуць вынікі трох спартсменак розных узроставых катэгорый. Акрамя таго, у кожнай катэгорыі вызначацца пераможцы ў мнагабор'і і фіналах асобных відаў.

Урачыстая цырымонія адкрыцця пачнецца сёння а 16-й гадзіне, а самі спаборніцтвы стартуюць апоўдні. У прамым эфіры за развіццём падзей можна назіраць на "Беларусь 5" і YouTube-канале "Спорт для ўсіх".