Паўднёваамерыканскія краіны падалі сумесную заяўку на правядзенне чэмпіянату свету па футболе - 2030

Аргенціна, Уругвай, Парагвай і Чылі аб'ядналіся для падачы агульнай заяўкі на правядзенне чэмпіянату свету па футболе ў 2030 годзе. Такое рашэнне аргументавана стагадовым юбілеем будучага мундыялю. Нагадаем, у 1930 годзе першыя спаборніцтвы прымаў Уругвай.

Згодна з канцэпцыяй арганізатараў, матч-адкрыццё плануецца правесці на дамашнім стадыёне клуба "Рывер Плейт" - "Манументаль" у Буэнас-Айрэсе. Фінал адбудзецца на арэне "Сентэнарыа" ў Мантэвідэа. Менавіта там першы тытул у гісторыі ўзяла зборная Уругвая. Выніковае месца правядзення планетарнага форуму стане вядома на 74-м кангрэсе ФІФА ў японскай Осацы ў 2024 годзе.