Віншаванне Старшыні Белтэлерадыёкампаніі Івана Эйсманта калектыву тэлеканала "Беларусь 3" з 10-годдзем са дня стварэння

Паважаныя калегі!

Сардэчна віншую вас з 10-годдзем тэлеканала "Беларусь 3".

Першы ў рэспубліцы сацыякультурны канал быў створаны ў структуры Белтэлерадыёкампаніі па даручэнні кіраўніка дзяржавы ў 2013 годзе. З гэтага моманту творчая каманда спецыялізаванай "кнопкі" - карэспандэнты і публіцысты, мастацтвазнаўцы і аўтары-дакументалісты - прыкладае максімум намаганняў для ўвекавечання ў кадры гісторыка-культурнай і духоўнай спадчыны Беларусі і разам з тым трымае руку на пульсе сучаснага культурнага жыцця краіны.

Народныя звычаі, традыцыі і абрады - ключы да разумення культурнага кода беларусаў - склалі ўнікальную відэаэнцыклапедыю, якая папаўняецца новымі старонкамі. Кожная знакавая святочная і памятная дата з гісторыі краіны адгукаецца тэматычнымі падборкамі перадач. Прызнаным мэтрам і маладым артыстам, якія сталі з гадамі добрымі сябрамі тэлеканала, адведзены лепшы час у эфіры. Мастацкія тэлеверсіі спектакляў, канцэртных і музычных праграм не ўпускаюць ніводнай дэталі, каб мы маглі атрымліваць асалоду ад магіі сцэны. Любімае савецкае і беларускае кіно не сыходзіць з экранаў: кінематограф і ўсё, што з ім звязана, знаходзіцца на асобным ганаровым месцы ў лінейцы канала.

На працягу дзесяці гадоў "Беларусь 3", несумненна, займае важную нішу ў айчынным тэлевяшчанні, застаючыся для дапытлівай аўдыторыі правадніком у свет высокага і прыгожага, запрашаючы да ўдумлівай, але разам з тым нязмушанай размовы пра наш агульны лёс і адзіную гістарычную памяць, жамчужыны гісторыка-культурнай і духоўнай спадчыны краіны, таленты беларускай зямлі. Усе гэтыя гады ў эфіры дзясяткі ўласных тэлепраграм не проста ствараюцца на беларускай мове - кожная з іх напоўнена непадробнай любоўю аўтараў да сваёй прафесійнай справы. "Беларусь 3" не спекулюе на моўнай тэме і не спрабуе зарабіць на ёй сумніўны капітал, а займаецца сапраўдным прасоўваннем роднай мовы.

Паважаныя калегі, дазвольце пажадаць вам і надалей несці сваю любоў у эфір, ствараць гэтакі ж займальны і карысны тэлепрадукт для гледачоў усіх узростаў, каб як мага больш беларусаў і гасцей нашай краіны натхняліся разам з вамі самабытнасцю беларускай культуры. Паспяховых стартаў і гучных прэм'ер, творчай моцы і палёту думкі ў новым дзесяцігоддзі вашай гісторыі!

З найлепшымі пажаданнямі, Іван Эйсмант