21 сакавіка горад Паставы стане цэнтрам музычнага жыцця краіны

21 сакавіка горад Паставы стане цэнтрам музычнага жыцця краіны. Тут пройдуць фіналы адборачных тураў удзельнікаў XXIV Міжнароднага дзіцячага конкурсу “Віцебск-2026” і XXXV Міжнароднага конкурсу выканаўцаў эстраднай песні “Віцебск-2026”. Сачыць за выступленнямі канкурсантаў змогуць і тэлегледачы. «Беларусь 3» пакажа трансляцыі абодвух канцэртаў.

Трансляцыя з горада Паставы Віцебскай вобласці пачнецца на тэлеканале “Беларусь 3” у 12:00. Першымі за права выступіць на галоўнай сцэне Міжнароднага фестывалю мастацтваў “Славянскі базар у Віцебску – 2026” будуць змагацца дзеці. У 17:00 творчае спаборніцтва, якое пройдзе з удзелам папулярных артыстаў эстрады, працягнуць дарослыя.

Нагадаем, у заключны тур нацыянальнага адбору выйшлі 20 выканаўцаў - 10 дзяцей ва ўзросце ад 8 да 14 гадоў і столькі ж маладых вакалістаў ва ўзросце ад 18 да 31 года. Усе яны паспяхова прайшлі папярэднія адборы.