23 лістапада праект "Суразмоўцы" пазнаёміць гледачоў з 250-м госцем - Жаннай Міус

23 лістапада на тэлеканале "Беларусь 3" у аўтарскім праекце заслужанага дзеяча культуры Рэспублікі Беларусь Навума Гальпяровіча "Суразмоўцы" гледачы пазнаёмяцца з 250-м госцем. Ім стане пісьменніца з Магілёўшчыны Жанна Міус.

У 2018 годзе пісьменнік і публіцыст Навум Гальпяровіч задумаў праект "Суразмоўцы", у якім з запрошанымі гасцямі вядзе размову пра беларускую культуру.

За 6 гадоў колькасць суразмоўцаў вырасла да 250 чалавек. А выпускаў праекта выйшла яшчэ больш. Такія вядомыя аўтары, як Алесь Бадак, Віктар Шніп, Зіновій Прыгодзіч, Уладзімір Мазго, Кацярына Хадасевіч-Лісавая штогод выдаюць свежыя кнігі, а гэта добрая нагода сустрэцца і абмеркаваць літаратурныя навінкі.

Сярод суразмоўцаў як знаныя літаратары, лаўрэаты Нацыянальнай літаратурнай прэміі або кіраўнікі Саюза пісьменнікаў Беларусі - Алесь Карлюкевіч, Алена Стэльмах, Аляксей Чарота, так і пачаткоўцы, якія толькі сёлета сталі сябрамі арганізацыі. Гэта, напрыклад, такія аўтары, як Максім Хацкевіч і Паліна Корнева.

Калі з першымі вядучы разважае над актуальнымі праблемамі ў літаратуры або па-сяброўску над вечнымі філасофскімі пытаннямі, то з другімі гутарка ідзе пра сучасныя тэндэнцыі і літаратурныя інтарэсы моладзі, пра кнігі і гаджэты, якія спрабуюць існаваць разам.

Геаграфія праграмы таксама пашыраецца. Часам госці праекта "Суразмоўцы" пераадольваюць сотні кіламетраў, каб завітаць на здымачную пляцоўку Нацыянальнай бібліятэкі Беларусі і сустрэцца з Навумам Гальпяровічам.

Некаторыя выбітныя пісьменнікі, якія за гэты час пайшлі з жыцця (Аляксей Дудараў, Мікола Мятліцкі, Серж Мінскевіч), застануцца светлымі і ўсмешлівымі ў кадрах праграмы "Суразмоўцы".

А вось як выказаліся пра праект самі госці.

Зіновій Прыгодзіч, заслужаны дзеяч культуры Рэспублікі Беларусь, пісьменнік, журналіст: "Я гляджу кожную праграму, і не таму, што Навум Гальпяровіч мой сябар, а таму што мне цікава паслухаць яго пытанні і адказы людзей, якія прыходяць. Я ведаю, што многія мае знаёмыя глядзяць "Суразмоўцы" і ў горадзе, і на дачы, куды я часта прыязджаю. Таму дзякуй за гэтую праграму ўсім стваральнікам!"

Максім Хацкевіч, сябра Саюза пісьменнікаў Беларусі: "Як толькі пачуў, што ёсць такая праграма, я адразу ўсё кінуў і пабег глядзець, і шмат бачыў выпускаў. На нашым тэлебачанні гэта вельмі самабытны праект, але мне здаецца, крыху мала часу даецца для праграмы, бо можна толькі павярхоўна прайсціся ў размове пра творчасць, а паглыбіцца не заўсёды паспяваеш…"

Соф’я Шах, лаўрэат Нацыянальнай літаратурнай прэміі: "Я не ўсе праграмы бачыла, але некаторыя выпускі пераглядала некалькі разоў. Праграмы Навума Якаўлевіча заўсёды здзіўляюць нечаканымі паваротамі!"

Дзмітрый Герасімёнак, загадчык кафедры гісторыка-культурнай спадчыны Беларускага дзяржаўнага ўніверсітэта культуры і мастацтваў: "Я хацеў бы пажадаць праграме "Суразмоўцы" працягваць і надалей сваю дзейнасць, бо мы бачым унікальную пярліну Беларускага тэлебачання менавіта такога фармату, звязанага з культурай. Навум Гальпяровіч ахоплівае ўсе напрамкі дзейнасці і можа разгаварыць кожнага чалавека на адкрытую размову, дзе можна ў прынцыпе расказаць усё, што заўгодна, пра культуру і атрымаць ад гэтага асалоду".

Юбілейнай госцяй праграмы стане пісьменніца, сябар Магілёўскага абласнога аддзялення Саюза пісьменнікаў Беларусі Жанна Міус. У яе творчай скарбонцы проза і зборнікі вершаў для дзяцей і дарослых, акрамя таго пісьменніца ладзіць сустрэчы і праекты з удзелам юнай аўдыторыі.

Жанна ўжо амаль 25 гадоў жыве ў вёсцы Чавускага раёна, не любіць публічнасці, вырошчвае кветкі, якім прысвячае вершаваныя радкі, і называе сябе "паэткай з глыбінкі".

Праграма "Суразмоўцы" з удзелам Жанны Міус выйдзе на тэлеканале "Беларусь 3" 23 лістапада ў 16:25.