Фільм тэлеканала "Беларусь 3" адзначаны дыпломам IX Рэспубліканскага фестывалю беларускіх фільмаў

Спецыяльным дыпломам "За раскрыццё тэмы "Вялікае ў малым. Жыццё, аддадзенае працы" быў адзначаны фільм рэжысёра Анжэлікі Новікавай "Жыццё маё "Харошкі". Валянціна Гаявая" (2024). Фільм распавядае пра заснавальніцу і нязменнага кіраўніка харэаграфічнага ансамбля "Харошкі", пра цесную сувязь таленавітай жанчыны і мастацтва, якому яна прысвяціла ўсю сябе. Дакументальная стужка даступная да прагляду на афіцыйным YouTube-канале "Беларусь 3".

Дыпломам "За шчырую адданасць і высокамастацкую рэалізацыю тэмы "Чалавек у мастацтве" адзначаны прадзюсар, тэлерэжысёр, сцэнарыст і вядучы Сяргей Кацьер. Гэта ўзнагарода - знак прызнання яго шматгадовай плённай працы. Праз яго творчасць гледачы адкрываюць для сябе свет выбітных беларускіх дзеячаў культуры, а іх постаці набываюць асаблівую жыццёвую паўнату.

Падрабязна пра ўдзельнікаў і пераможцаў ІX Рэспубліканскага фестывалю беларускіх фільмаў распавядуць карэспандэнты "Навін культуры" ў эфіры тэлеканала "Беларусь 3".