Прамыя трансляцыі з Ліды - як "Беларусь 3" адзначыць Дзень беларускага пісьменства

6 і 7 верасня Ліда прыме ХХХIІ Дзень беларускага пісьменства. У святочныя дні тэлеканал “Беларусь 3” прапануе тэматычны эфір. Гледачоў чакаюць аператыўныя выпускі навін, трансляцыі асноўных канцэртных праграм з Ліды, а таксама тэлеверсіі спектакляў і мастацкія стужкі паводле твораў класікаў айчыннай літаратуры.

Свята беларускага пісьменства было заснавана ў 1994 годзе ў знак ушанавання нацыянальнай культуры, багацця і самабытнасці беларускай мовы. Штогод у першую нядзелю верасня маштабны фестываль збірае гасцей і знаёміць са шматлікімі матэрыяльнымі і духоўнымі каштоўнасцямі краіны.

Традыцыйна здымачная група "Беларусь 3" наведае ўсе святочныя пляцоўкі, пазнаёміцца з гасцямі і выступоўцамі і даведаецца, чым будзе здзіўляць Ліда. Усе падрабязнасці – у выпусках "Навін культуры".

Ключавымі эфірнымі падзеямі падчас правядзення культурнага форуму стануць трансляцыі асноўных канцэртных праграм.

Так, 6 верасня ў 12:00 у рэжыме рэальнага часу будзе паказаны гала-канцэрт удзельнікаў розных гадоў Рэспубліканскага конкурсу юных чытальнікаў "Жывая класіка". У гэты ж дзень у 21:05 увазе гледачоў прапануюць цырымонію ўрачыстага адкрыцця ХХХIІ Дня беларускага пісьменства і святочны канцэрт "Слова Радзімы: моц і прыгажосць краіны".

Прамая трансляцыя цырымоніі ўрачыстага закрыцця фестывалю і святочнага канцэрта адбудзецца на "Беларусь 3" 7 верасня ў 14:00.

На працягу двух дзён праграма сацыякультурнага канала будзе складацца з мастацкіх фільмаў і тэлеверсій спектакляў паводле твораў беларускіх літаратараў, а ў міжпраграмных перапынках прагучаць вершы на роднай мове.

У тэматычнай падборцы гульнявых стужак - "Вайна пад стрэхамі", "Сыны ідуць у бой", "Міколка-паравоз", "Вазьму твой боль", "Дзікае паляванне караля Стаха" і "Белыя Росы".

Акрамя гэтага, запланаваны паказ айчынных мультфільмаў: "Магістр вольных мастацтваў. Францыск Скарына" і "Я тайну ў глыбіні душы хаваю… Максім Багдановіч".

Першыя выхадныя верасня падораць гледачам "Беларусь 3" выдатную магчымасць дакрануцца да свету айчыннага тэатральнага мастацтва і атрымаць асалоду ад пастановак паводле вядомых твораў В. Быкава, А. Дударава і Янкі Купалы.

У эфір выйдуць тэлеверсіі спектакляў "Альпійская баллада" Рэспубліканскага тэатра беларускай драматургіі, "Не пакідай мяне..." Нацыянальнага акадэмічнага драматычнага тэатра імя Якуба Коласа і "Паўлінка" Нацыянальнага акадэмічнага тэатра імя Янкі Купалы.

7 верасня ў 18:00 сацыякультурны канал пакажа дакументальны фільм "Уладзімір Караткевіч. Народжаны для кахання". Чаму папулярны пісьменнік, якога называлі першым рамантыкам краіны, доўгі час заставаўся адзінокім, як складваліся яго ўзаемаадносіны з жанчынамі і хто здолеў сагрэць сэрца халасцяка? Рамантычную гісторыю класіка распавядзе дакументальная стужка.

Фота: Навіны Ліды